हेटौंडाः नवोदय साहित्यिक बाल बगैंचाको आयोजनामा मुक्तक लेखन प्रशिक्षण सम्पन्न भएको छ । हेटौंडा–४, कमलडाँडास्थित नवोदय शिशु सदन माविमा अध्ययनरत विद्यार्थीलाई मुक्तक लेखन सम्बन्धमा प्रशिक्षण दिइएको हो ।
हेटौंडा क्याम्पसका प्राध्यापक एवम् मुक्तककार मनोज पोखरेलले विद्यार्थीहरुलाई प्रशिक्षण दिनुभएको हो । प्रशिक्षक मनोज पोखरेलले कार्यक्रममा मुक्तक सिद्धान्त, संरचना, हाल मुक्तक लेखनमा देखिएको प्रवृत्तिबारे जानकारी दिँदै मुक्तक लेखनको अभ्याससमेत गराउनुभएको थियो ।
प्रशिक्षणमा करिब ७० जना विद्यार्थीहरुको सहभागिता रहेको थियो । नवोदय साहित्यिक बाल बगैंचाकी अध्यक्ष स्तुती गुरागाईंको अध्यक्षतामा सम्पन्न कार्यक्रममा विद्यालयका शिक्षकहरु रोशन चौलागाईं, उपेन्द्र राना, भवानी सापकोटा लगायतको उपस्थिति रहेको थियो ।
