हेटौँडाः काभ्रेपलाञ्चोक जिल्लाको पनौती नगरपालिका–५, धनेश्वरमा मोटरसाइकलले स्कुटरलाई ठक्कर दिँदा स्कुटर चालकको मृत्यु भएको छ । मंगलबार दिउँसो ४ बजेर १० मिनेटको समयमा बनेपा पनौती भित्री सडकखण्डमा बनेपाबाट पनौतीतर्फ जाँदै गरेको बा प्र ०२–०२२ प ७५९७ नम्बरको स्कुटर आफैं अनियन्त्रित भई सडकमा पल्टिएको र विपरित दिशाबाट बनेपातर्फ जाँदै गरेको बा ७८ प ५९६५ नम्बरको मोटरसाइकलले ठक्कर दिएको बागमती प्रदेश प्रहरी कार्यालय हेटौँडाले जानकारी दिएको छ ।
मोटरसाइकलले ठक्कर दिँदा स्कुटर चालक पनौतीका ४२ वर्षीय रामकृष्ण कुँवर घाइते भएका थिए । घाइते कुँवरलाई उपचारका लागि शिर मेमोरियल अस्पताल बनेपा लैजाँदै गर्दा बाटोमा नै मृत्यु भएको प्रहरीले जनाएको छ । मोटरसाइकल चालक धुलिखेल नगरपालिका–४ का २१ वर्षीय रिज सुवाललाई प्रहरीले नियन्त्रणमा लिएको छ ।
