हेटौंडाः श्रीपञ्चमी वा वसन्त पञ्चमीका अवसरमा मंगलबार विभिन्न शैक्षिक संस्थाहरुमा सरस्वती पूजा गरिएको छ । विभिन्न सरस्वती मन्दिर तथा घरघरमा समेत सरस्वतीको पूजा आराधना गरी श्रीपञ्चमी मनाइएको छ ।
हेटौंडाको मकवानपुर बहुमुखी क्यापसमा, हेटौंडा क्याम्पस, हेटौंडा स्कूल अफ म्यानेजमेन्ट, नारायणी कलेजलगायत सबै सामुदायिक तथा निजी विद्यालयमा सरस्वती पूजाको विशेष कार्यक्रम आयोजना गरिएको थियो । मकवानपुर बहुमुखी क्याम्पसमा सरस्वती पूजाको प्रसाद ग्रहण गर्न बागमती प्रदेशका मुख्यमन्त्री डोरमणि पौडेलसमेत पुग्नुभएको थियो । मकवानपुरका प्रमुख जिल्ला अधिकारी गोविन्दप्रसाद रिजाल, मकवानपुर क्याम्पस सञ्चालक समिति अध्यक्ष अन्नतप्रसाद पौडेललगायतले पनि सरस्वती पूजाको प्रसाद ग्रहण गर्नुभएको थियो ।
हेटौंडा ४ स्थित भूटनदेवी माध्यमिक विद्यालयमा सरस्वती पूजाको अवसरमा विद्यालयका स्काउटरहरुले सहयोग गरेका थिए । अन्य विद्यालय तथा कलेजहरुमा पनि शिक्षक, विद्यार्थी, पूर्वविद्यार्थी, अभिभावकलगायतको सहभागितामा सरस्वती पूजा गरिएको थियो । सरस्वती पूजाको अवसरमा विभिन्न विद्यालयहरुले बालबालिकालाई अक्षरारम्भ गराएका थिए ।
