ज्योतिराज लुइटेल
सिनियर अहेव, मनहरी प्राथमिक स्वास्थ्य चौकी
मकवानपुर जिल्लामा पछिल्लो समय कोरोना सङ्क्रमितको संख्या बढेको छ । मकवानपुरका सबै स्थानीय तहहरुमा अहिले स्वाबको नमूना सङ्कलन पनि बढेको छ । जिल्लामै एउटा मात्रै हेटौंडामा आइसोलेसन वार्ड कोरोना सङ्क्रमितले भरिएर बेड अभाव हुँदा धेरै जना कोरोना सङ्क्रमितहरु होम आइसोलेसनमा बस्न बाध्य छन् । यस्तो अवस्थामा मकवानपुरको मनहरी गाउँपालिकाले के कस्तो तयारी गर्दैछ ? मनहरीमा कोराना संक्रमणको अवस्था लगायतको सन्दर्भमा रहेर मनहरी प्राथमिक स्वास्थ्य चौकीका सिनियर अहेव ज्योतिराज लुइटेलसँग समाज संवाददाता सुसन लामिछानेले गर्नुभएको कुराकानीः
समाजः मनहरीमा अहिले कोरोना सङ्क्रमणको अवस्था कस्तो छ ?
लुइटेलः केही दिन अगाडि हामीसँग १२ जना सङ्क्रमित थिए । उनीहरु सबै निको भएर घर गइसकेका छन् । उनीहरुलाई फलोअप गर्दा कुनै पनि समस्या देखिएको छैन । अब तत्काल हामीलसँग १५ जना क्वारेन्टिनमा छन् उनीहरुको स्वाबको नमूना संकलन गरेर हेटौंडाको कोरोना प्रयोगशालामा परीक्षण गर्न पठाइएको छ । रिपोर्ट कुरेर बसिरहेका छौं ।
समाजः मनहरीमा स्वाब सङ्कलन कार्य कसरी भइरहकोे छ ?
लुइटेलः मनहरी गाउँपालिकामा दैनिक स्वाबको नमूना सङ्कलन हुँदैन । ५ देखि ७ दिनको फरकमा स्वाब सङ्कलन हुने गरेको छ । क्वारेन्टिनमा रहनुहुने सबैको स्वाबको नमूना सङ्कलन गरेर परीक्षण गर्न हेटौंडा पठाउने गरेका छौं । यस्तै मनहरीसँगै राक्सिराङ गाउँपालिकाले अनुरोध गरेको खण्डमा प्राविधिक पठाएर स्वाबको नमूना सङ्कलन हुने गरेको छ ।
समाजः मनहरी गाउँपालिकाको राजमार्गको दायाँ–बायाँ ५ सय मिटर क्षेत्रमा निषेधाज्ञा लागू गरिएको छ । यस्तो अवस्थामा अन्य सेवाग्राहिहरुले कसरी स्वास्थ्य सेवा पाइरहेका छन् ?
लुइटेलः स्वास्थ्यकर्मीहरु सबै स्टेन्डबाइमा छन् । दैनिक ओपिडी सेवा, आकस्मिक सेवा पनि सञ्चालनमा छ । कुनै पनि सेवा बन्द गरेका छैनौं । दैनिक सेवाग्राहीहरु आउने गरेका छन् । नियमित औषधी खानेहरु (सुगर, प्रेसर) का विरामीहरुलाई पनि स्वास्थ्य बीमा मार्फत औषधीहरु उपलब्ध गराएका छौं । सेवाग्राहीहरुलाई भौतिक दूरी कायम गरेर लक्षणका आधारमा पनि औषधीहरु दिएर पठाउने गरेका छौं ।
समाजः पछिल्लो समय स्वाबको नमूनाको सङ्कलन बढेको छ की ?
लुइटेलः हामीले ३ दिनअघि ३४ जनाको स्वाबको नमूना सङ्कलन गरेका थियौं । अब फेरि भोलितिर स्वाब सङ्कलन गर्ने योजना छ । स्वाब सङ्कलन बढेको हो ।
समाजः स्वास्थ्कर्मीहरु कति सुरक्षित भएको पाउनुभएको छ ?
लुइटेलः हामीसँग स्वास्थ्य सुरक्षा सामग्री छन् । स्वाब सङ्कलन गर्दा सुरक्षाको उपाय सबै अपनाइएको छ । स्वाब सङ्कलन गर्दा पनि अनिवार्य मास्क र सेवा दिँदा भौतिक दूरी कायम गरिएको छ ।
समाजः मनहरीमा छुट्टै आइसोलेसन वार्ड बन्न थालेको हो ?
लुइटेलः मनहरीमा २० बेडको आइसोलेसन वार्ड बन्ने तयारी भइरहेको छ । आज अथवा भोलिबाट सञ्चालनमा ल्याउने गरी तयारी भइरहेको छ । त्यसैका लागि अहिले हामी खटिएका छौं । आजै पोजेटिभ आएमा मनहरीका नागरिकलाई छुट्टै आइसोलेनमा राख्ने गरी तयारी भइरहेको छ । अहिले बत्ति, पानी लागयतको सम्पूर्णको व्यवस्थापनमा हामी जुटेका छौं । मनहरीमा अहिले २ वटा क्वारेन्टिन सञ्चालनमा छन् ।
