हेटौंडाः कोरोना सङ्क्रमितहरुको सम्पर्कमा को–को आएका थिए, कुन कुन स्थानमा गएका थिए भनेर गरिने कन्ट्रयाक ट्रेसिङ मकवानपुर जिल्लामा सक्रिय रहेकोे जिल्ला स्वास्थ्य कार्यालय मकवानपुरका प्रमुख प्रणय उपाध्यायले बताउनुयभो । मकवानपुरको हेटौंडा उपमहानगरपालिकामा ३ वटा टिम, थाहा नगरमा २ र प्रत्येक गाउँपालिकामा प्राविधिक सहितको स्वास्थ्यकर्मीहरुको एक टीमले कन्ट्रयाक ट्रेसिङ गरिरहेको उहाँले बताउनुभयो ।
जिल्लामा अहिले कोरोना सङ्क्रमितको संख्या बढेकोले केही ढिलाई भएको हुन सक्ने तर ट्रेसिङ कार्य निरन्तर भैरहको उहाँले जानकारी दिनुभयो । उहाँका अनुसार जिल्लाका १० स्थानीय तहलाई कन्ट्रयाक ट्रेसिङ गर्न बागमती प्रदेशको स्वास्थ्य निर्देशनालय, स्वास्थ्य कार्यालयले पनि प्रांविधिक सहयोग गर्ने बताउनुभयो । यस्तै डब्लुएचओका प्रतिनिधी डा. समिक्षाले पनि ट्रेसिङ कार्य कसरी गर्ने भन्ने बारे प्राविधिक सहयोग गरिरहेको बताउनुभयो ।
यता हेटौंडा उपमहानगरपालिकाले भने संङ्क्रमितको संख्या बढेपछि हरेक वडाका स्वास्थ्य चौकिलाई ट्रेसिङ गर्न तयार गरेको छ । हरेक वडामा भएको स्वास्थ्य चौकिको जनशक्तिबाटै कन्ट्रयाक ट्रेसिङ हुने गरेको हेटौंडा उपमहानगरपालिकाका स्वास्थ्य शाखाका प्रमुख सुपेन्द्र कार्कीले बताउनुभयो । उहाँका अनुसार अहिले सङ्क्रमितको पहिचान भएपछि सङक्रमितलाइ आइसोलेट गर्ने र सोहीसँग क–कसको सम्पर्कमा रहेको, कुन कुन स्थानमा गएको बुझ्ने र क्रस भेरिफाई गर्ने कार्य हुँदै आएको छ । आवश्यकता अनुसार ट्रेसिङ भएकाहरुको स्वाबको नमूना सङ्कलन गरी कोरोना परिक्षण गर्न पठाइएको पनि कार्कीले बताउनुभयो ।
