हेटौँडा ः सहिद सप्ताह २०८१ को अवसरमा मंगलबार वक्तृत्वकला प्रतियोगिता भएको छ । सहिद स्मारक विकास समितिको आयोजना तथा मदन भण्डारी फाउण्डेसन मकवानपुरको व्यवस्थापनमा प्रतियोगिता भएको हो ।
मदन भण्डारी फाउण्डेसन मकवानपुरका अध्यक्ष रघुनाथ खुलालको अध्यक्षतामा भएको वक्तृत्वकला प्रतियोगिता सहिद स्मारक विकास समितिका अध्यक्ष एवम् बागमती प्रदेशका प्रथम मुख्यमन्त्री डोरमणि पौडेलको प्रमुख आतिथ्यमा सम्पन्न भएको हो । ‘लोकतन्त्र प्राप्तिका लागि राजनीतिक दलहरुको भूमिका’ विषयक नगरस्तरीय बाल क्लबहरुको सहभागितामा भएको प्रतियोगितामा विभिन्न वडाका १२ जनाको सहभागिता रहेको थियो ।
प्रतियोगितामा सुप्रिया मोक्तान प्रथम, आदित्य पराजुली दोस्रो, सुनिल न्यौपाने तेस्रो र सपना बर्तौला सान्त्वना भएको प्रतियोगिता संयोजक कुमार केसीले जानकारी दिनुभयो । प्रतियोगितामा प्रथम हुनेलाई नगद १० हजार पाँच, द्वितीय हुनेलाई नगद ७ हजार पाँच, तृतीय हुनेलाई ५ हजार पाँच र सान्त्वना हुनेलाई एकहजार पाँच रुपैयाँ पुरस्कार प्रदान गरिएको थियो ।
