हेटौंडाः मकवानपुर प्रहरीले अवैध भरुवा बन्दुकसहित मनहरी गाउँपालिका–९ स्थित हरियाली सामुदायिक वनबाट एक जनालाई पक्राउ गरेको छ । मंगलबार साँझ ५ बजेको समयमा भरुवा बन्दुकसहित राक्सिराङ्ग गाउँपालिका–१, गडुवानका ५२ वर्षीय जीतबहादुर थिङलाई पक्राउ गरिएको जिल्ला प्रहरी कार्यालय मकवानपुरले जनाएको छ ।
भरुवा बन्दुक बोकेर हिँडिरहेको अवस्थामा थिङलाई नियन्त्रणमा लिएको जिल्ला प्रहरी कार्यालय मकवानपुरले जनाएको छ । थिङको साथबाट भरुवा बन्दुक एक थान, फलामको विभिन्न आकारको गोलाकार बेरिङ १३ थान, फलामको जस्तो देखिने विभिन्न आकारको लाम्चो आकारको वस्तु ३३ थान, बारुद जस्तो देखिने पाउडर ३ सय ५ ग्राम, ढुंगाको जस्तो देखिने वस्तु २४ थान, खुकुरी १ थान बरामद भएको प्रहरीले जनाएको छ । थिङविरुद्ध हातहतियार तथा खरखजना सम्बन्धी मुद्दामा थप अनुसन्धान भइरहेको प्रहरीले बताएको छ ।
