हेटौंडाः मकवानपुर जिल्लाको दुई सडक खण्ड पहिरोका कारण अबरुद्ध भएको छ । हेटौंडा–काठमाडौं छोटो मार्गअन्तर्गत मकवानपुरको भीमफेदी गाउँपालिका वडा नम्बर ८ को शिलालेख भन्ने ठाउँमा पहिरो जाँदा कान्तिलोकपथ सडकखण्ड पूर्णरुपमा अवरुद्ध भएको छ ।
त्यस्तै मकवानपुरबाट कुलेखानी हुँदै काठमाडौं जोडने सडक पनि पहिरोको कारण अवरुद्ध भएको छ । सडकखण्ड अन्तर्गत ईन्द्रसरोवर गाउँपालिका वडा नम्बर २ सुकौरामा सोमबार बिहान पहिरो जाँदा सडक अवरुद्ध भएको हो । पहिरोका कारण सोमबार दिनभरी नै सडक अवरुद्ध भएको हो । दुबै सडकहरुको पहिरो पन्छाउने कार्य भएको जिल्ला प्रहरी कार्यालय मकवानपुरका प्रहरी नायव उपरीक्षक ईन्द्रबहादुर रानाले जानकारी दिनुभयो ।
