हेटौंडाः लागूऔषधसहित एक जना महिलालाई प्रहरीले पक्राउ गरेको छ । शनिबार राति ११ बजेर ३० मिनेटको समयमा लागूऔषधसहित महिलालाई जिल्ला प्रहरी कार्यालय बाराका प्रहरीले पक्राउ गरेको हो ।
बाराको जीतपुर सिमरा उपमहानगरपालिका वडा नम्बर–१ स्थित प्रहरी चौकी पथलैयाबाट खटिएको प्रहरी टोलीले गौरबाट काठमाडौंतर्फ जाँदै गरेको बा.प्र.०१–००६ ख ५१५९ नम्बरको यात्रुबाहक बसलाई रोकी सुरक्षा जाँच गर्दा बसको डिक्कीमा लुकाईछिपाई ल्याएको १२ डिम्बा लागूऔषध बरामद गरेको जिल्ला प्रहरी कार्यालय बाराले जानकारी दिएको छ ।
नोरफिन–१२०० पिस इन्जेक्सन, ड्राइजोपाम–१२०० पिस इन्जेक्सन र फेनारगल–१२०० पिस इन्जेक्सन ओसारपसारमा संग्लन रहेकी रौतहट जिल्लाको कटहरिया नगरपालिका–७ बस्ने अन्दाजी २१ वर्षीया मुस्कानकुमारी दासलाई नियन्त्रणमा लिई आवश्यक कानुनी प्रक्रिया अगाडि बढाइएको प्रहरीले जानकारी दिएको छ ।
