हेटौँडाः लागुऔषध गाँजासहित काभ्रेपलाञ्चोक जिल्लाको धुलिखेल नगरपालिका–१२ का २९ वर्षीय किरण वाग्लेलाई मकवानपुर प्रहरीले पक्राउ गरेको छ । शनिबार राती १ बजेको समयमा ईलाका प्रहरी कार्यालयबाट खटिएको प्रहरी टोलीले वाग्लेले चलाएर ल्याएको प्रदेश ३–०१–०२४ च ६३६१ नम्बरको योद्धा जीपबाट प्रहरीले एक सय ६२ केजी ५८० ग्राम लागुऔषध गाँजा बरामद गरेको जनाएको छ ।
विशेष सूचनाको आधारमा पूर्व–पश्चिम राजमार्गअन्तर्गत मनहरीबाट हेटौँडातर्फ आउँदै गरेको जीपलाई प्रहरीले रोकेर सुरक्षाजाँच गर्दा गाँजा बरामद भएको प्रहरीले जानकारी दिएको छ । प्रहरीले बरामद गरेको गाँजासहित जीपसहित वाग्लेलाई हिरासतमा राखेर अनुसन्धान गरिरहेको जनाएको छ । मकवानपुर जिल्ला अदालतले वाग्लेलाई ४ दिन हिरासतमा राखेर अनुसन्धान गर्न अनुमति दिएको छ ।
