हेटौँडाः सिन्धुली जिल्लाको हरिहरपुर गाउँपालिकामा एक व्यक्ति माथि गोली प्रहार भएको छ । मकवानपुरबाट सिन्धुलीतर्फ जाँदै गरेका मकवानपुर जिल्लाको बागमती गाउँपालिका–१ का प्रेम बहादुर बोम्जनमाथि हरिहरपुरगढी गाउँपालिका–६, हप्सेमा गोली प्रहार भएको प्रहरीले जनाएको छ ।
तराई मुलका ३ जना अपरिचित व्यक्तिले बोम्जनमाथि गोली प्रहार गरेको जिल्ला प्रहरी कार्यालय सिन्धुलीले जनाएको छ । जिल्ला प्रहरी कार्यालय सिन्धुलीका प्रहरी नायव उपरीक्षक अनिल कुमार खड्काका अनुसार मकवानपुरबाट प्रदेश २–००३–००६ प ८४५४ नम्बरको मोटरसाइकलमा सिन्धुलीतर्फ जाँदै गरेका बोम्जन माथि गोली प्रहार भएको थियो ।
उहाँका अनुसार ३ जनाको समूहमा आएका व्यक्तिले मोटरसाइकलमा सवार बोम्जनलाई रोकी छोटो हतियार (कट्टा) प्रहार गरेका थिए । गोली प्रहार गरेसँगै तीनै जना फरार रहेको प्रहरी नायव उपरीक्षक खड्काले बताउनुभयो । बोम्जनसँगै सवार रहेका बोम्जन भाइ दिल बहादुर बोम्जन भने सकुशल रहेका छन् । गोली प्रहारबाट मोटरसाइकल चलाइरहेका बोम्जनले प्रयोग गरेको हेलमेटको दायाँ तर्फबाट गाला छेडिएको प्रहरी नायव उपरीक्षक खड्काले जानकारी दिनुभयो ।
गोली बोम्जनको दाँतमा अड्किएको छ । गोली प्रहारबाट घाइते भएका बोम्जनको सर्लाहीस्थित मोडल अस्पतालमा सामान्य उपचार पश्चात थप उपचारका लागि वीरगञ्जको वयोधा अस्पताल पठाइएको प्रहरी नायव उपरीक्षक खड्काले बताउनुभयो । बोम्जनको अवस्था सामान्य रहेको छ । गोली प्रहार गरी फरार रहेका समुहको खोजी कार्य भइरहेको छ । बोम्जन बकैया गाउँपालिका–३ हातिसुँडेस्थित बुद्ध माध्यमिक विद्यालयका प्रधानाध्यापक हुन् ।
