हेटौँडाः मदन भण्डारी लोकमार्गको हेटौँडा–सिन्धुली सडकखण्डअन्तर्गत मकवानपुरको बागमती गाउँपालिका–४, हरामिटोलमा स्कुटरको ठक्करबाट एक महिलाको मृत्यु भएको छ । सोमबार दिउँसो ४ बजेर २० मिनेटको समयमा हेटौँडाबाट सिन्धुलीतर्फ जाँदै गरेको बा प्र ०३–००४ प ७२७६ नम्बरको स्कुटरले बागमती गाउँपालिका–४ की ४८ वर्षीया गंगा पहरी र ५ वर्षीय अनुप पहरीलाई ठक्कर दिएको थियो ।
स्कुटरको ठक्करबाट गम्भीर घाइते भएकी गंगा पहरीको मृत्यु भएको जिल्ला प्रहरी कार्यालय मकवानपुरले जानकारी दिएको छ । स्कुटरको ठक्करबाट गम्भीर घाइते भएकी गंगाको उपचारको क्रममा हेटौँडास्थित चुरेहिल हस्पिटलमा मृत्यु भएको प्रहरीले जनाएको छ । यस्तै अनुप पहरीको उपचार भइरहेको छ । प्रहरीले ठक्कर दिने स्कुटर र चालक हेटौँडा–६, चौघडाका २६ वर्षीय अनुप कुमार क्षेत्रीलाई नियन्त्रणमा लिएको छ ।
