हेटौँडाः पूर्व–पश्चिम राजमार्गअन्तर्गत हेटौँडा–१५ रातोमाटेमा मोटरसाइकल र म्याजिक भ्यान आपसमा ठोक्किएर दुर्घटना हुँदा २ जना गम्भीर घाइते भएका छन् । रातोमाटेबाट हेटौँडा बजारतर्फ जाँदै गरेको ना १० प १०५९ नम्बरको मोटरसाइकल र विपरित दिशाबाट आउँदै गरेको ना १ ज ८४७५ नम्बरको म्याजिक एक आपसमा ठोक्किएर दुर्घटना हुँदा मोटरसाइकलमा सवार दुईजना गम्भीर घाइते भएका छन् भने म्याजिक चालक फरार रहेको प्रहरीले जनाएको छ ।
शनिबार साँझ दुर्घटनामा परी मोटरसाइकल चालक मकवानपुरको भीमफेदी गाउँपालिका–६, सिमलटारका १९ वर्षीय रविन तामाङ र मोटरसाइकलमा सवार मकवानपुरगढी गाउँपालिका–१ रानीशेराका २२ वर्षीय दावा लामा बम्जन गम्भीर घाइते भएको प्रहरीले जानकारी दिएको छ । रविन र दावा दुबैजनाको टाउको र शरीरको विभिन्न ठाउँमा चोट लागेको छ । हेटौँडा अस्पतालमा उपचारपछि थप उपचारका लागि भरतपुरस्थित पुरानो मेडिकल कलेजमा उपचारका लागि लगिएको प्रहरीले जानकारी दिएको छ । उपचारपश्चात दुबै जनाको स्वास्थ्य अवस्थामा सुधार आएको बताइएको छ ।
