हेटौंडाः हेटौंडा–२ स्थित मकवानपुर बहुमुखी क्याम्पसको कक्षा १२ को मानविकी र शिक्षा शास्त्रअन्तर्गत ऐच्छिक अंग्रेजी विषय अध्ययनरत विद्यार्थीहरुले वृद्धाश्रमलाई खाद्यान्न सहयोग गरेका छन् । शुक्रबार विद्यार्थीहरुले हेटौंडा–२, चौकीटोलमा रहेको ॐ वृद्धाश्रममा खाद्यान्न सहयोग गरेको शिक्षक समार्गी हुमागाईंले जानकारी दिनुभयो ।
विद्यार्थीहरुले कलेज खुलेदेखि भदौ महिनासम्म विद्यालयमा अनुपस्थित भएको दिन ५–१० रुपैयाँ संकलन गर्दै आएका थिए । संकलन गरेको रकम ७ हजार ५ सय रुपैयाँ भएको र सोही रकमबाट वृद्धाश्रममा सहयोग गरेको हुमागाईंले जानकारी दिनुभयो ।
वृद्धाश्रममा फलफूल, चामल, दाल, अण्डा, तेल आदि खाद्यान्न सामग्री दिइएको हो । विद्यार्थीहरुले वर्षेनि यस्तो कार्य गर्दै आएको उहाँले जानकारी दिनुभयो । वितरण कार्यक्रममा क्याम्पस प्रमुख यमबहादुर सिलवाल र सहायक क्याम्पस प्रमुख उत्तम अर्यालको उपस्थिति रहेको थियो । मानविकी र शिक्षाशास्त्र अन्तर्गत ऐच्छिक अंग्रेजी पढ्ने ५५ जना विद्यार्थी रहेका छन् ।
