हेटौंडाः मकवानपुर जिल्ला लिग फुटबल प्रतियोगिताअन्तर्गत बुधबारको खेलमा आरआर वाईसी, सक्षम युवा क्लब र रियल स्टार क्लब विजयी भएका छन् । हेटौंडा–६ स्थित गौरीटार रंगशालामा भएको पहिलो खेलमा हेटौंडा भेट्रान्स क्लबलाई ३–१ गोलले आरआर वाईसी विजयी भएको हो ।
यस्तै, हेटौंडा–११ स्थित सिमलटार मैदानमा भएको पहिलो खेलमा एफसी विजय युथलाई २–१ गोलले हराउँदै सक्षम युवा क्लब र सिमलटारमै भएको दोस्रो खेलमा हेटौंडा फुटबल एकेडेमीलाई ६–१ गोलले हराउँदै रियल स्टार क्लब विजयी भएका छन् । गौरीटारमा भएको पिप्ले युवा क्लब र एफसी इन्टरनेटबीचको खेल गोलरहित बराबरीमा रोकिएको छ ।
प्रतियोगिताको फाइनल खेल असोज ९ गते हुनेछ । प्रतियोगिताको उपाधि विजेता टिमले एक लाख रुपैयाँसहित शिल्ड, मेडल तथा प्रमाणपत्र प्राप्त गर्नेछन् भने उपविजेता टिमले ५० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् ।
