हेटौंडाः रोटरी क्लब अफ मकवानपुर आयोजनामा तथा पिप्ले युवा क्लबको सह–आयोजनामा जारी राष्ट्रिय रोटरी भेट्रान्स फुटबल प्रतियोगिता अन्तर्गत आज बिहिबार पहिलो चरणको अन्तिम दुई खेल हुँदैछ । हेटौंडा–५,स्थित पिप्ले क्याम्पा रंगशालामा हुने पहिलो खेलमा एसएनकेसी भेट्रान्स काठमाडौं र सिमराको नवजागृति भेट्रान्स काठमाडौंबीच प्रतिस्पर्धा हुनेछ । यस्तै आजैको दोस्रो खेलमा बीरगञ्ज एकेडेमी भेट्रान्स र वगरभाइ खलक भेट्रान्स पोखराबीच प्रतिस्पर्धा हुनेछ । पहिलो खेल दिउँसो २ बजेबाट सुरु हुनेछ भने दोस्रो खेल ३ बजेर ३० मिनेटमा सुरु हुनेछ ।
आजको खेल सम्पन्न भएसँगै प्रतियोगिताको क्वार्टरफाइनल समीकरण पूरा हुनेछ । बुधबार भएको पहिलो खेलमा खेलमा वीरगञ्ज उपमहानगरपालिकाको युनिटी भेट्रान्सलाई ५–१ गोल अन्तरले हराउँदै फिडम भेट्रान्सले जितेको थियो भने बुधबार नै भएको दोस्रो खेलमा अभिषेक चर्चलाई टाइब्रेकरमा ४–२ गोल अन्तरले हराउँदै सिमरा भेट्रान्स विजयी भएको थियो ।
प्रतियोगितामा १५ टिमहरुको सहभागिता रहेको छ । प्रतियोगिताको फाइनल खेल आउँदो सोमबार हुनेछ । प्रतियोगिताको उपाधि विजेता टिमले दुई लाख दुई हजार दुई सय २२ रुपैयाँ र उपविजेता टिमले एक लाख एक हजार एक सय ११ रुपैयाँसहित शिल्ड, मेडल तथा प्रमाणपत्र प्राप्त गर्नेछन् । यस्तै विधागत उत्कृष्ट खेलाडीहरुका लागि पनि पुरस्कारको व्यवस्था गरिएको छ ।
