हेटौँडाः मदन भण्डारी राजमार्गको हेटौँडा–सिन्धुली सडकखण्डअन्तर्गत मकवानपुरको हेटौँडा उपमहानगरपालिका–१७, कठायतचोकमा गत शुक्रबार मोटरसाइकल दुर्घटनामा परी घाइते उत्तम गौतमको मृत्यु भएको छ । शुक्रबार राती १० बजेर ५० मिनेटको समयमा हेटौँडा बजारबाट ठूलोदमारतर्फ जाँदै गरेको ना ६४ प २७१० नम्बरको मोटरसाइकल दुर्घटना हुँदा मोटरसाइकलमा सवार गौतम घाइते भएका थिए ।
मकवानपुरको बकैया गाउँपालिका–४ का ४४ वर्षीय प्रभाव गौतमले चलाएको मोटरसाइकलमा सवार ४६ वर्षीय उत्तम गौतम गम्भीर घाइते भएका थिए । गम्भीर घाइते गौतमलाई उपचारका लागि पुरानो मेडिकल कलेज भरतपुर लगिएको थियो । भरतपुरले उपचार सम्भव नहुने भनी फिर्ता पठाएपछि गौतमलाई हेटौँडास्थित चुरेहिल अस्पतालमा राखिएको थियो । आइतबार राती ९ बजेर २० मिनेटको समयमा चुरेहिल अस्पतालमा गौतमको मृत्यु भएको प्रहरीले जनाएको छ । मोटरसाइकल चालक प्रभाव गौतम भने सामान्य घाइते भएको र अवस्था सामान्य रहेको प्रहरीले जानकारी दिएको छ ।
