हेटौँडाः मकवानपुरको मनहरी गाउँपालिका–६, जोगितालका भक्तबहादुर घलान श्रीमति, छोरा र ससुराबाट कुटिएका छन् । आइतबार राती १० बजेको समयमा ४२ वर्षीय भक्त बहादुरलाई ४५ वर्षीया श्रीमति धनमाया घलान, छोरा १७ वर्षीय मिलन घलान र ससुरा नाता पर्ने ६५ वर्षीय आईत सिं वाईबाले कुटपिट गर्नुका साथै धारिलो हतियार प्रयोग गरी घाइते बनाएको बागमती प्रदेश प्रहरी कार्यालय हेटौँडाले जनाएको छ ।
घरायसी विषयमा विवाद हुँदा खुर्पा प्रहारबाट भक्तबहादुरको टाउको र निधारमा गहिरो चोट लागेको छ । घाइते भक्तबहादुरको भरतपुरस्थित अस्पतालमा उपचार भइरहेको र अवस्था गम्भीर रहेको प्रहरीले जानकारी दिएको छ । भक्तबहादुरलाई आक्रमण गर्ने श्रीमति, छोरा र ससुरालाई प्रहरीले नियन्त्रणमा लिएको छ ।
