हेटौंडाः हेटौंडा–४ स्थित पारिजातपथ टोल विकास संस्थाको १६ औं वार्षिक साधारणसभा सम्पन्न भएको छ । शनिबार संस्थीकी अध्यक्ष सिर्जना पौडेलको सभाध्यक्ष तथा हेटौंडा–४ का वडाध्यक्ष नवीन सिग्देलको प्रमुख आतिथ्यमा साधारण भएको हो ।
साधारणसभाको अवसरमा संस्थाले ज्येष्ठ नागरिक, विद्यार्थी, खेलाडी र साहित्यकारलाई सम्मान गरेको छ । संस्थाले टोलभित्रका ज्येष्ठ नागरिक जोगेन्द्र ठकुरीलाई सम्मान गरेको छ । यस्तै हेटौंडा फुटबल एकेडेमीका प्रशिक्षक एवम् रेफ्री भीम लामा र साहित्यकारतर्फ सिस्नुपानी नेपाल मकवानपुरका अध्यक्ष राजकुमार लामिछानेलाई सम्मान गरेको छ । एसईईमा उत्कृष्ट नतिजा ल्याउने सक्षम पौडेल र कक्षा १२ मा उत्कृष्ट नतिजा ल्याउने शुभम् दासलाई सम्मान गरेको छ ।
कार्यक्रममा संस्थाकी अध्यक्ष पौडेलले वार्षिक प्रगति प्रतिवेदन र कोषाध्यक्षले आर्थिक प्रतिवेदन प्रस्तुत गर्नुभयो । अध्यक्ष पौडेलले संस्थाले डेङ्गु रोग नियन्त्रणबारे वडाभित्र सचेतना कार्यक्रम, बालबालिकाका लागि खेलकुद लगायत विभिन्न सरसफाईका कार्यक्रमहरु आयोजना गरेको बताउनुभयो । उहाँका अनुसार टोलभित्र २ सय घरधुरी छ ।
कार्यक्रममा हेटौंडा–४ की वडासदस्य गीता त्रिपाठी, हेटौंडा–५ की सदस्य रञ्जिता सिलवाल, नगर टोल विकास समन्वय समितिका महासचिव शिवहरी दाहाल, हेटौंडा–४ स्तरीय टोल विकास समितिका संयोजक राजेन्द्र बास्ताकोटी र वडा बाल सहजकर्ता अमिषा अधिकारी लगायतको उपस्थिति रहेको थियो ।
