हेटौँडाः २०७२ साल बैशाख १२ गतेको भूकम्पले पुर्याएको क्षतिलाई स्मरण गर्दै भूकम्पमा ज्यान गुमाएकाको स्मृतिमा बुधबार हेटौँडाका दुई स्थानमा स्मृति सभा भएको छ ।
हेटौँडा–२ स्थित मकवानपुर बहुमुखी क्याम्पसमा संस्थापक क्याम्पस प्रमुख मुकुन्द दास श्रेष्ठ र हेटौँडा–४ स्थित मकवानपुर जिल्ला खेलकुद विकास समितिमा केशवलाल श्रेष्ठको स्मृति सभा भएको छ । २०७२ साल बैशाख १२ गतेको भूकम्पमा परी मुकुन्ददास र केशवलालको काठमाडौंमा निधन भएको थियो ।
केशवलाल श्रेष्ठ भलिबल खेलको तत्कालिन प्रमुख राष्ट्रिय प्रशिक्षक हुनुहुन्थ्यो । मुकुन्ददास श्रेष्ठको मकवानपुर बहुमुखी क्याम्पसमा अर्धकदको प्रतिमा स्थापना गरिएको छ भने केशवलाल श्रेष्ठको मकवानपुर जिल्ला खेलकुद परिसरमा अर्धकदको प्रतिमा स्थापना गरिएको छ । मकवानपुर बहुमुखी क्याम्पसमा क्याम्पस सञ्चालक समितिका अध्यक्ष अनन्तप्रसाद पौडेल, उपाध्यक्ष अशोक शाक्य, क्याम्पस प्रमुख डा. यमबहादुर सिलवाल, स्वतन्त्र विद्यार्थी युनियनका अध्यक्ष छोइसाङ लामासहित प्राध्यापक, कर्मचारी, विद्यार्थीको सहभागिता रहेको थियो ।
यस्तै केशवलाल श्रेष्ठको स्मृतिमा मकवानपुर जिल्ला खेलकुद विकास समिति परिसरमा केशवलाल श्रेष्ठ स्मृति केन्द्रीय प्रतिष्ठानको आयोजनामा स्मृति सभा भएको हो । कार्यक्रममा प्रतिष्ठानका अध्यक्ष प्रताप विष्टसहित पदाधिकारीको सहभागिता रहेको थियो ।
