हेटौँडाः मकवानपुरको कैलाश गाउँपालिकामा दोस्रो संस्करणको अध्यक्ष कप फुटबल प्रतियोगिताको सुरु भएको छ । बुधबार गाउँपालिकाका अध्यक्ष लोक बहादुर मोक्तानले प्रतियोगिता उद्घाटन गर्नुभयो ।
कैलाश–९, नामटारमा सुरु प्रतियोगिताको उद्घाटन खेलमा वडा नम्बर १० ले विजयी सुरुवात गरेको छ । वडा नम्बर ४ लाई ३–० गोलको फराकिलो अन्तरले पराजित गर्दै १० नम्बर वडाले विजयी सुरुवात गरेको हो । बुद्ध थिङ र सागर बलले एक–एक गोल गरे भने एक गोल आत्मघाती उपहार पाएको हो । वडा नम्बर १० प्रतियोगिताको साविक विजेतासमेत हो । वडा नम्बर १० ले अब सेमिफाइनल प्रवेशका लागि बिहिबार प्रतिस्पर्धा गर्नेछ ।
यस्तै बुधबारको दोस्रो खेलमा वडा नम्बर ५ र ९ बीच खेल हाफ समय मात्र खेलेर रोकेको छ । बाँकी समयको खेल बिहिवार बिहान हुने रेफ्री सन्तोष राईले बताउनुभयो । विजयी टिमले बिहिबार वडा नम्बर ८ सँग प्रतिस्पर्धा गर्नेछ । यस्तै बिहिबारको खेलमा वडा नम्बर २ र ३, ६ नम्बर वडा र ७ नम्बर वडाबीच प्रतिस्पर्धा हुनेछ । कैलाश खेलकुद विकास समितिका संयोजक मोहन वाईबाको सभाध्यक्षतामा भएको प्रतियोगिता उद्घाटन कार्यक्रममा गाउँपालिकाका उपाध्यक्ष बाल कुमार मल्ल, प्रमुख प्रशासकीय अधिकृत विनोद रोक्का र वडाध्यक्षहरुको पनि उपस्थिति रहेको थियो ।
