हेटौँडाः बारा जिल्लामा बोलेरो र ट्रक आपसमा ठोकिँदा २ जनाको मृत्यु भएको छ । बुधबार बिहान ५ बजेर ३५ मिनेटको समयमा पूर्व–पश्चिम राजमार्गअन्तर्गत बाराको जीतपुर सिमरा उपमहानगरपालिका–१, आधाभारमा दुर्घटना हुँदा २ जनाको मृत्यु भएको जिल्ला प्रहरी कार्यालय बाराले जानकारी दिएको छ ।
दुर्घटनामा परी अन्य ४ जना गम्भीर घाइते भएका छन् । मृत्यु हुनेमा बोलेरो चालक नुवाकोट जिल्लाको बिदुर नगरपालिका–९, कोल्नीका ३० वर्षीय सुजन मगराती र बोलोरोमा सवार भारतको बिहार राज्यको मोतिहारीका २८ वर्षीय चन्दन चौहान रहेको प्रहरीले जनाएको छ । सिमराबाट हेटौँडातर्फ जाँदै गरेको ना ६ ख ३३५२ नम्बरको ट्रक र हेटौँडाबाट पथलैयातर्फ जाँदैै गरेको बा प्र ०१–०२६ च १३३४ नम्बरको योद्धा पिकअप एक आपसमा ठोकिँदा योद्धा पिकअपमा सवार ५ जना गम्भीर घाईते भएका थिए । घाइते भएकाहरुको उपचारका लागि न्यूरो अस्पताल बारामा लागिएको थियो । उपचारको क्रममा मगराती र चौहानको मृत्यु भएको प्रहरीले उल्लेख गरेको छ ।
दुर्घटनामा परी भारतको बिहार राज्यको मजफरपुर जिल्ला, परखना मोतिपुर थाना, दरूराज ग्राम सिसुवाका २२ वर्षीय राहुल चौधरी, १७ वर्षीय सुदिप चौहान, भारतको बिहार राज्यको गोरखपुरका १९ वर्षीय राम लखन चौहान र ट्रक चालक बारा जिल्लाको जीतपुर–सिमरा उपमहानगरपालिका–२, हुलासटोलका ३० वर्षीय रवि पटेलको न्यूरो अस्पताल बारामा उपचारमा भइरहेको प्रहरीले जनाएको छ ।
