हेटौँडाः मकवानपुरको बकैया गाउँपालिकामा भिरबाट लडेर एकजना घाइते भएका छन् भने राक्सिराङमा रुखबाट लडेर एक जना वृद्ध घाइते भएको बागमती प्रदेश प्रहरी कार्यालय हेटौँडा जानकारी दिएको छ । मकवानपुरको बकैया गाउँपालिका–१२, कोलखोपमा भिरबाट लडेर एक जना घाइते भएका छन् । घाइते हुनेमा काठमाडौं–मधेश–तराई द्रूतमार्गमा काम गर्ने हेटौँडा–१७ गैरीगाउँका ३८ वर्षीय श्रीकृष्ण विक रहेको प्रहरीले जानकारी दिएको छ ।
सोमबार बेलुका ७ बजेको समयमा विक काम सकेर क्याम्पमा फर्कने क्रममा भिरबाट ३० मिटर तल लडी टाउकोमा चोट लागेको र अवस्था मध्यम भई उपचारका लागि हेटौँडा अस्पताल ल्याइएको थियो । विकलाई थप उपचारका लागि राती १० बजेर ३० मिनेटको समयमा नयाँ मेडिकल कलेज भरतपुर लगिएको प्रहरीले जानकारी दिएको छ ।
मकवानपुरको राक्सिराङ गाउँपालिका–४, जयसिङतालमा रुखबाट लडेर एकजना वृद्ध घाइते भएका छन् । घाइते हुनेमा ८१ वर्षीय ईन्द्र बहादुर थिङ रहेको प्रहरीले जानकारी दिएको छ । सोमबार बिहान ९ बजेको समयमा थिङ घर नजिक कटमेरोको रुखमा घाँस काट्न चढ्ने क्रममा रुखबाट लडेर ढाड र करङमा चोट लागी उपचारका लागि पुरानो मेडिकल कलेज भरतपुर लगिएको र अवस्था मध्यम रहेको प्रहरी जानकारी दिएको छ ।
