हेटौंडाः कोरोना भाइरसको संक्रमणको अवस्थालाई हेरेर सरकारले लकडाउनलाई केही खुकुलो बनाउने निर्णय गरे पनि मकवानपुरमा भने लकडाउन खुला भएको छ । मकवानपुर जिल्लामा स्थानीय प्रशासन र प्रहरीले लकडाउनलाई खुकुलो बनाउँदा अपनाउनुपर्ने सतर्कतातर्फ ध्यान दिन सकेको छैन । निजी सवारी साधनमा जोर–विजोर प्रणाली लागु गराउन स्थानीय प्रशासन र प्रहरीले ध्यान दिएको छैन ।
मकवानपुरमा निर्वाध रुपमा सबै प्रकारका निजी सवारी साधन चलेका छन् । सार्वजनिक यातायातको रुपमा अटो, मयुरी, ढुवानीका साधन पनि निर्वाध चलेका छन् । मंगलबार जिल्ला प्रशासन कार्यालयले लकडाउनका बेला जारी गरिएको सवारी पास सबै खारेज गरेको निर्णय समेत सार्वजनिक गरेको छ । जोर–विजोर लागु नगर्दा र सार्वजनिक सवारीका साधन अटो, मयुरीलाई नियमन नगर्दा बजारक्षेत्रमा भीडभाड बढेको छ । कोरोना भाइरसको संक्रमण फैलन सक्ने खतराका कारण सर्वसाधारणमा भने त्रास बढेको छ ।
