हेटौंडाः मकवानपुरको मकवानपुरगढी गाउँपालिका–१ की एक युवतीले आफूलाई ब्ल्याकमेल गरी पटकपटक यौनशोषण गरेको भन्दै प्रहरीमा जाहेरी दिएको तीन साता पूरा भएको छ । सोही ठाउँका २४ वर्षीय युवकले आफ्नो नग्न तस्वीर खिचेर ब्ल्याकमेल गरी निरन्तर यौनशोषण गरेको भन्दै किशोरीले गत पुस ११ गते जिल्ला प्रहरी कार्यालय मकवानपुरमा उजुरी दिएकी थिइन् ।
तर, उजुरी दिएकोे तीन साता पूरा भएपनि आरोपित युवा अझै फरार छन् । प्रहरीले हालसम्म उनलाई पक्राउ गर्न सकेको छैन । जिल्ला प्रहरी कार्यालय मकवानपुरका प्रहरी प्रवक्ता प्रहरी नायव उपरीक्षक लक्ष्मी भण्डारीले उनको खोजी कार्य भइरहेको बताउनुभयो । पीडित युवतीले ९ कक्षा पढ्दादेखि नै चिनेको उक्त युवकले गत बैशाखमा किशोरीको कोठामै गएर नग्न तस्वीर खिचेर ब्ल्याकमेल गर्न सुरु गरेको प्रहरीमा दर्ता गरेको जाहेरीमा उल्लेख गरेकी छन् । ती युवकले किशोरीको फेसबुक आइडीसमेत लिएर किशोरीको नग्न तस्वीर राखेर यौनकर्मीको रुपमा प्रचारसमेत गरिदिएको पीडितको आरोप छ ।
