हेटौंडाः हेटौंडा–२ स्थित स्वयम्भू डाँडामा रहेको टाशी हिसे गुम्बामा तीन दिवसीय दोर्जे फुर्पा बज्रालिया पूजाको आयोजना हुने भएको छ । बुधबार आयोजकले पत्रकार सम्मेलन आयोजना गर्दै यही माघ १४ गतेदेखि १६ गतेसम्म पूजा हुने जानकारी गराएको हो ।
मानिसमा पुगेको विभिन्न क्षतिलाई मध्यनजर गर्दै मानव उन्नतिको कामनाका लागि पूजाको आयोजना गर्न लागेको आयोजकले जनाएको छ । बौद्ध मणि समिति टाशी हिसे हेटौंडा–२ को आयोजनामा हुन लागेको पूजाको उद्घाटन बागमती प्रदेशका आर्थिक मामिला तथा योजना मन्त्री बहादुर सिंह लामाले गर्नुहुनेछ ।
पूजाको माध्यबाट निर्माण भइरहेको गुम्बाको विकास थप टेवा पुग्ने आयोजकले अपेक्षा गरेको छ । पूजा आयोजनाका लागि करिब १० लाख रुपैयाँ खर्च हुने आयोजकको अनुमान छ । पूजा आयोजनाका लागि विभिन्न सहयोगदाता तथा भक्तजनहरुले दान गरेको रकमबाट सहयोग प्राप्त हुनसक्ने जनाइएको छ ।
