हेटौंडाः जेसीआई हेटौंडा वर्ष २०२४ को अध्यक्षमा विकेशलाल श्रेष्ठ निर्वाचित हुनुभएको छ । शनिबार भएको निर्वाचनमा निकटतम प्रतिद्वन्द्वी अमृत बर्तौलालाई पाँच मतले पराजित गर्दै श्रेष्ठ अध्यक्षमा निर्वाचित हुनुभएको हो ।
विजयी श्रेष्ठले ८६ प्राप्त गर्नुभयो भने पराजित बर्तौलाले ८१ मत प्राप्त गर्नुभयो । विजयी श्रेष्ठ र पराजित बर्तौला दुवैजना वर्ष २०२३ को कार्यकारिणी उपाध्याक्ष हुनुहुन्थ्यो । निर्वाचनमा बर्तौलाको प्यानलबाट उम्मेद्वारी दिएका दुई जना कार्यकारिणी उपाध्यक्ष र चार जना उपाध्यक्ष चयन भएका छन् । कार्यकारिणी उपाध्यक्षमा विवेकानन्द न्यौपाने १ सय ३ मत र जीवन ढकालले ८६ मत प्राप्त गरी निर्वाचित हुनुभएको छ । श्रेष्ठ प्यानलबाट कार्यकारिणी उपाध्यक्षमा उम्मेद्वारी दिएका विश्वप्रसाद गौतम ७२ मत र विपिन ताम्राकार ६५ मतसहित पराजित हुनुभएको छ ।
यस्तै उपाध्यक्षमा आशिष दाहाल १ सय ५३ मत, रमेश काफ्ले १ सय १८ मत, रमेश पराजुली १ सय २ मत र विश्वास पराजुली ८८ मतसहित विजयी हुनुभएको छ भने श्रेष्ठ प्यानलका विवेक फुयाल ८५ मत र किरण आले मगर ७४ मत प्राप्त गरी पराजित भएका छन् । उपाध्यक्षमा श्रेष्ठ प्यानलबाट दुई जनाले उम्मेदवारी दिएका थिए । नयाँ नेतृत्व चयनका लागि भएको निर्वाचनमा १ सय ७६ सदस्यमध्ये १ सय ६७ जनाले मतदान गरेका थिए ।
