हेटौंडाः मकवानपुर जिल्ला क्रिकेट संघले आयोजना गरेको प्रधानमन्त्री कप क्रिकेट टिम छनोट प्रतियोगितामा रेड स्वाइललाई हराउँदै मकवानपुर क्रिकेट क्लब फाइनलमा पुगेको छ । बुधबार हेटौंडा–४ स्थित हुप्रचौरमा भएको खेलमा मकवानपुर क्रिकेट क्लब ६ विकेटले विजयी भएको हो ।
पहिले व्याटिङ गरेको रेड स्वाइलले ३३ ओभर ५ बलमा सबै विकेट गुमाएर १४५ रन जोड्न सफल भएको थियो । रेड स्वाइलको तर्फबाट रमेश लुईंटेलले सर्वाधिक ३८ रन जोड्न सफल भएका थिए । रिषभ चौधरीले अविजित रहँदै २७ रन जोडे । त्यस्तै, राहुल केशरीले १९ रन र गौरव क्षेत्रीले १३ रन जोडेका थिए । मकवानपुर क्रिकेट क्लबका तक्षक सिम्खडाले सर्वाधिक ४ विकेट लिन सफल भएका थिए । रिजन ढकाल र सन्तोष उपाध्यायले समान २–२ विकेट लिएका थिए ।
जवाफी व्याटिङमा उत्रिएको मकवानपुर क्रिकेट क्लबले १६ ओभर २ बलमा ३ विकेट गुमाएर रेड स्वाइलले दिएको लक्ष्यलाई भेटाएको थियो । मकवानपुर क्रिकेटको जितका लागि टिम कप्तान सुमन सुनारले सर्वाधिक ६२ रन जोडे । तक्षक सिम्खडाले ४९ रन, रिजन ढकालले १२ रन र सृजन ढकालले ६ रन बनाएका थिए । रेड स्वाइलका राजीव यादव, नवीन शर्मा र आर्यनले १–१ विकेट लिए । छनोट प्रतियोगितामा ५ वटा टिमको सहभागिता रहेको छ । प्रतियोगिताअन्तर्गत् आज बिहीबार ओमनगर र मकवानपुर क्रिकेट क्लबबीच प्रतिस्पर्धा भइरहेको छ ।
