हेटौंडाः लागूऔषध गाँजासहित ३ जनालाई मकवानपुर प्रहरीले पक्राउ गरेको छ । आइतबार बिहान साढे ८ बजेको समयमा पूर्व–पश्चिम राजमार्गअन्तर्गत हेटौँडा–१५, रातोमाटेबाट नौ केजी ९८० ग्राम लागूऔषध गाँजासहित मकवानपुरको मनहरी गाउँपालिका–८ का १९ वर्षीय दीपक मुक्तान, ५० वर्षीय बुद्धीमान मुक्तान र ४० वर्षीय मंगल सिं थोकरलाई पक्राउ गरिएको जिल्ला प्रहरी कार्यालय मकवानपुरले जनाएको छ ।
हेटौँडाबाट बीरगन्जतर्फ जाँदै गरेको ना ४ ख ५९२२ नम्बरको यात्रुवाहक बसलाई रोकी सुरक्षाजाँच गर्ने क्रममा लागूऔषधसहित तीन जनालाई पक्राउ गरिएको प्रहरीले जनाएको छ । लागूऔषधसहित नियन्त्रणमा लिई मकवानपुर जिल्ला अदालतबाट १० दिनको म्याद थप गरी हिरासतमा राखिएको छ ।
