हेटौँडाः अमेरिकामा बसोबास गरिरहनुभएका भारतीय मूलका नेपाली प्रज्वल पराजुलीको कृति “चित्रलेखाको चौरासी” माथि शुक्रबार बिहान हेटौँडामा परिचर्चा भएको छ । अंग्रेजी भाषामा लेखिएको “ल्याण्ड ह्वेयर आई फ्ली” उपन्यासको नेपाली अनुवादको रुपमा “चित्रलेखाको चौरासी” नेपालयले प्रकाशन गरेको हो । हेटौँडा क्याम्पसको नेपाली शिक्षा विभागको आयोजना तथा किताबघरको संयोजनमा परिचर्चा कार्यक्रम भएको हो ।
परिचर्चामा पुस्तकका लेखक प्रज्वल पराजुलीले “चित्रलेखाको चौरासी” उच्चमध्यम परिवारको कथा भएको उल्लेख गर्नुभयो । ५ दिनअघि मात्रै नेपाल आउनुभएका प्रज्वलले आफ्नो नेपाली भाषा बोल्ने क्षमतामा क्रमशः सुधार भइरहेको उल्लेख गर्नुहुँदै नेपाली भाषामै कथाको कल्पना गरेर तयार पारिएको अंग्रेजी उपन्यासको नेपाली अनुवादको रुपमा चित्रलेखाको चौरासी तयार भएको बताउनुभयो । नेपाली भाषामा अनुवाद भएको चित्रलेखाको चौरासी लेखक आफैँले नेपाली भाषामा भने अध्ययन गरिसक्न भ्याउनुभएको छैन ।
पहिलो पटक हेटौँडा आउनुएका प्रज्वललाई हेटौंडाको भुगोल रमणीय लागेको छ । भारतको सिक्किममा जन्मे, हुर्केका प्रज्वलको मामघर ईलाम जिल्लाको जमुनामा छ । २८ वर्षअघि मामाघर पुग्नुभएका प्रज्वलको अंग्रेजी भाषामा लेखिएको उपन्यास “ल्याण्ड ह्वेयर आई फ्ली” पढ्दै गर्दा बेलायती, अमेरिकी मूलकै अंग्रेजी भाषी पाठकले यो अरु कुनै भाषाबाट अनुवाद गरिएको कृति जस्तै छ भन्ने प्रतिक्रियाले मनभित्रैबाट खुसी लाग्ने गरेको बताउनुहुन्छ । हेटौँडामा शुक्रबार बिहानको परिचर्चापछि शुक्रबार दिउँसो नवलपुरको गैँडाकोट र शनिबार पोखरामा समेत परिचर्चा गर्ने तयारीमा रहनुभएका लेखक प्रज्वलले चित्रलेखाको चौरासी कृति आफ्नै घर आएको जस्तै लागिरहेको बताउनुभयो ।
सानै छँदा भारतीय लेखकका अंग्रेजी भाषाको किताब पढ्ने गरेको र ती कृतिमा परिवारका ज्येष्ठ महिला, हजुरआमाहरुको कथाबाट प्रभावित भएर “ल्याण्ड ह्वेयर आई फ्ली” को नेपाली अनुवादको शीर्षक “चित्रलेखाको चरित्र” कल्पना गरेको बताउनुभयो । अमेरिकी, बेलायती पुरस्कारका लागि मनोनयनमा परेको उपन्यासको नेपाली अनुवाद विभु लुइटेलले गर्नुभएको हो । यसअघि प्रज्वलको “द गुर्खाज डटर” पनि चर्चित छ । “द गुर्खाज डटर” को पनि नेपाली अनुवाद “गोर्खाकी छोरी” नेपालयले नै प्रकाशन गरेको छ ।
“चित्रलेखाको चौरासी” माथि हेटौँडा क्याम्पसका नेपाल विषयका उपप्राध्यापक मनोज पोखरेलले टिप्पणी गर्नुभएको थियो । कार्यक्रममा दार्जिलिङ माइती भएकी हेटौँडा–३ स्थित शिक्षा विकास शिशु सदनकी प्रिन्सीपल ग्रेस श्रेष्ठले पनि पाठकीय टिप्पणी राख्नुभएको थियो ।
