हेटौंडाः हेटौंडा–७, नागस्वतीस्थित तासिर स्कूलका विद्यार्थी, शिक्षक र कर्मचारीले राष्ट्रिय आविष्कार केन्द्रलाई सहयोग गर्ने भएको छ । विद्यार्थी, शिक्षक, कर्मचारीले आफ्नो जन्मदिनको अवसरमा सहयोग रकम उपलब्ध गराउने जनाएको छ । आइतबार कक्षा–३ मा अध्ययनरत आयन सापकोटाले पाँच सय पाँच रुपैयाँ सहयोग गरी अभियानको सुरुवात गरिएको छ ।
अभिभावकको समेत उपस्थितिमा सापकोटाले सहयोग रकम सहयोगपेटीमा खसालिएको छ । विद्यालयका प्रिन्सीपल विनोद थपलियाका अनुसार विद्यार्थी, शिक्षक र कर्मचारीलाई बाध्य नगरिने र स्वेच्छिक रुपमा सहयोग गर्न सकिने व्यवस्था मिलाइएको छ । सहयोग संकलन अभियानको सुरुवातमा विद्यालयले आइतबारै १० हजार एक सय एक रुपैयाँ सहयोग बाकसमा राखिएको प्रिन्सीपल थपलियाले जानकारी दिनुभएको छ । संकलित सहयोग रकम छ महिनामा आविष्कार केन्द्रलाई पठाउने उहाँले बताउनुभयो ।
