हेटौंडाः मकवानपुरको बकैया गाउँपालिकामा जारी गाउँपालिकास्तरीय फुटबल प्रतियोगिताको क्वाटरफाइनल समिकरण पुरा भएको छ । मंगलबार बिहान वडा नम्बर ४ र १२ बीचको खेल सम्पन्न भएसँगै प्रतियोगिताको क्वाटरफाइनल समिकरण पुरा भएको हो ।
मंगलबार बिहान भएको खेलमा ४ नम्बर वडाले १२ नम्बर वडालाई ५–१ गोल अन्तरले हराएको छ । ४ नम्बर वडाको जितमा उमेश सञ्जेलले ह्याट्रिक गरेका थिए । खेलको म्यान अफ द म्याच सञ्जेल घोषित भए । उनले नगद १ हजार ५ सय रुपैयाँ प्राप्त गरेका छन् ।
प्रतियोगिताको क्वाटरफाइनलको खेलहरु आज मंगलबार नै सञ्चालन हुने प्रतियोगिता संयोजक विजय लामा थिङले जानकारी दिनुभयो । आज मंगलबारको पहिलो खेलमा दिउँसो १ बजे १ नम्बर वडा र ६ नम्बर वडाबिच प्रतिस्पर्धा हुनेछ । यस्तै दोस्रो क्वाटरफाइनल खेलमा दिउँसो ३ बजे ७ नम्बर वडा र ९ नम्बर वडाबीच प्रतिस्पर्धा हुनेछ ।
बुधबार तेस्रो क्वाटरफाइनल खेलमा वडा नम्बर ५ र ८ बीच प्रतिस्पर्धा हुनेछ भने अन्तिम तथा चौंथो क्वाटरफाइनल खेलमा ३ नम्बर वडा र ४ नम्बर वडाबिच प्रतिस्पर्धा हुनेछ । प्रतियोगिताको फाइनल खेल २७ गते हुनेछ । प्रतियोगिताको विजेताले नगद १ लाख ५० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन भने उपविजेताले नगद १ लाख रुपैयाँ प्राप्त गर्नेछन् ।
