हेटौंडाः बागमती प्रदेश प्रहरी कार्यालय हेटौंडाका प्रमुख प्रहरी नायव महानिरीक्षक (डिआइजी) किरण बज्राचार्यलाई बिदाई गरिएको छ । गत पुस २८ गतेको निर्णयअनुसार सरुवा हुनुभएका डिआइजी बज्राचार्यलाई बुधबार बागमती प्रदेश प्रहरी कार्यालयले एक कार्यक्रमको आयोजना गर्दै बिदाई गरेको हो ।
डिआइजी बज्राचार्यले २०७८ असार २२ गतेदेखि बागमती प्रदेश प्रहरी कार्यालयको प्रमुखको जिम्मेवारी सम्हाल्नुभएको थियो । डिआइजी बज्राचार्य हेटौंडाबाट नेपाल प्रहरीको प्रधान कार्यालयमा आर्थिक प्रशासन तथा प्रबन्ध निर्देशनालय नक्सालमा सरुवा हुनुभएको हो ।
बज्राचार्यको सरुवापछि प्रदेश प्रहरी प्रमुखमा नेपाल प्रहरी प्रधान कार्यालयको आर्थिक तथा प्रशासन शाखामा कार्यरत डिआइजी दीपक थापा आउनुहुने बागमती प्रदेश प्रहरी कार्यालयका निमित्त प्रमुख प्रहरी वरिष्ठ उपरीक्षक दीपक रेग्मीले जानकारी दिनुभयो । डिआइजी थापाले केही दिनमै बागमती प्रदेश प्रहरी प्रमुखको जिम्मेवारी सम्हाल्नुहुने उहाँले बताउनुभयो ।
