हेटौंडाः मदन भण्डारी स्पोर्टस् एकेडेमीको आयोजना तथा हेटौंडा उपमहानगरपालिका ४ नम्बर वडाको प्रायोजनमा जारी जिल्लास्तरीय शिक्षक भलिबल प्रतियोगिताको उपाधिका लागि जीएस निकेतन र महेन्द्र मावि भिड्ने भएका छन् । फाइनल खेल हेटौंडा–४, हुप्रचौरस्थित भलिबल कोर्टमा हुनेछ । फाइनल खेल आज शनिबार दिउँसो ३ बजे हुनेछ ।
शनिबार बिहान भएको पहिलो सेमिफाइनलमा जीएस निकेतनले बाघ भैरव माविलाई २५-१२, २५-१७ को सोझो सेटमा हराउँदै फाइनलमा प्रवेश गरेको हो । आजै भएको दोस्रो सेमिफाइनल खेलमा महेन्द्र माविले सुर्योदय माविलाई २५-२२, २५-१८ को सोझो सेटले हराउँदै महेन्द्र मावि फाइनलमा प्रवेश गरेको हो ।
उपाधि विजेता टिमले नगद २५ हजार रुपैयाँसहित शिल्ड, मेडल र प्रमाणपत्र प्राप्त गर्नेछ भने उपविजेता टिमले नगद १५ हजार रुपैयाँसहित शिल्ड, मेडल र प्रमाणपत्र प्राप्त गर्नेछ । यस्तै सेमीफाइनलमा पराजित हुने दुई टिम सुर्योदय मावि र बाघ भैरव माविले सान्त्वनास्वरुप ५ हजार रुपैयाँ प्राप्त गर्नेछ । भलिबल प्रतियोगितामा २६ वटा टिम सहभागी थियो ।
