हेटौंडाः नेपाली कांग्रेस बागमती प्रदेश सभापतिमा लगभग जित पक्का भएको प्रदेश सभापतिका उम्मेदवार जगदिश्वर सिंह केसीले बताउनुभएको छ । उहाँले आफुले विवेक र निष्ठाको मत प्राप्त गर्ने बताउनुभयो । कांग्रेस बागमती प्रदेशको शनिबार भएको मतदानमा ३ जना उम्मेदवारले ५० प्रतिशत बढी मत ल्याउन नसकेपछि आज इन्द्र बानियाँ र केसी बिच पुनः मतदान भइरहेको छ ।

यस्तै शनिबार भएको निर्वाचनमा तेस्रो हुनुभएको भीमसेन प्रधान दासले भने इन्द्र बानियाँको लागि आज मत माग्दै प्रतिनिधिसँग पुग्नुभएको छ । आज दिउँसो साढे १ बजेबाट सुरु भएको मतदान प्राविधिक कारणले ढिलाई भइरहेको छ । मत हाल्ने मतदाताहरु रिसाएका छन् । उनीहरुले प्रतिनिधिलाई प्रहरीले मत खसाल्ने ठाउँसम्म जान दिएका छैनन् । ३० जनाको दरले प्रहरीले लाइनबाट मत हाल्न पठाउने कोसिस गरेपनि मतदाताहरुलाई सम्हाल्न प्रहरीलाई हम्मे परिरहेको छ ।

यस्तो अवस्थामा पनि केसीले बानियाँ भन्दा आफु कांग्रेसका निष्ठा, आदर्श र सैद्धान्तिक आधारको चुरो भएको बताउनुभयो । विपीले प्रतिपादन गरेको समाज, राजनैतिक विचार आफुसँग भएको भन्दै केसीले अर्का साथी धन र बलको आधारमा, पैसा/शक्तिको आडमा मैदानमा आएको बताउनुभयो । यहाँ २० करौड लगानी गरेको भन्दै केसीले आस्था र निष्ठाको प्रतिबिम्ब को हो उसैलाई मत दिन आग्रह गर्नुभयो । उहाँले सबै प्रतिनिधिलाई विवेकको मत दिन भन्नुभएको छ । यहाँ त डर, त्रास र धम्की देखाइएको छ । डर त्रास र धम्ककीको मतदान नगर्न उहाँले आग्रह गर्नुभयो । हरेक मतदातालाई धम्काइएको भन्दै केसीले मतदातालाई विभिन्न प्रलोभन देखाएपनि मतदाताले स्वःविवेकको मत खसाल्ने धारणा राख्नुभयो ।
शनिबार भएको मतदानमा बलजफत २ सय मत बानियाँको पक्षको प्रतिनिधिले आफ्नो नाममा चिन्ह लगाएको केसीले बताउनुभयो । आज भएको दोस्रो चरणको मतदानमा त्यो कम भएको भन्दै आफ्नो विजय लगभग पक्का भएको दाबी गर्नुभयो ।

उहाँले बानियाँलाई समर्थन गर्नुभएको भिमसेन प्रधानप्रति कुनै टिप्पणी गर्न चाहनुभएन । ‘उहाँ आदर्शको प्रतिक हो । कुन राजनीतिक बलजफतीमा पर्नुभयो कसले के भन्यो आफ्नो ठाउँमा छ । उहाँले भनेको मत उता जादैन यो विवेकको मत मलाई नै आउँछ ।’ केसीले भन्नुभयो । हेटौंडाको फरेष्टि क्याम्समा भएको कांग्रेसको प्रदेश अधिवेशनमा भाग लिन आएका अपाङ्ग अर्जुन दुलालले आफुले आफ्नै विवेक प्रयोग गरेर मतदान गरेको बताउनुभयो ।

यस्तै काठमाडौंका गणेश बहादुर सुवेदीले भने स्टेचरमा मतदान स्थलमा पुगेर आफ्नो मत खसाल्नुभएको छ । शनिबार भएको मतदानस्थलमा लडेर खुट्टा पयाक्चर भएका सुवेदीलाई चार जनाले स्टेचरमा बोकेर ल्याएका थिए । यस्तै १ घण्टाबढी लामो समय लाइनमा उभिएर बस्नुपरेको भन्दै कांग्रेस प्रदेश प्रतिनिधि बनेर आएकाहरुले उचित व्यवस्थापन नभएको गुनासो गरे । शनिबार मतदान सम्पन्न भइसके पनि पुनः मतदान गर्नुपरेको, तेस्रो हुुनेले पहिलो हुनेलाई समर्थन गरेकोले स्वत दोस्रो हुनेले छोड्नुपर्ने बताउनुहुन्छ चितवनका कांग्रेस नेतृ लक्ष्मी लामिछाने ।

कांग्रेसको प्रदेश सभापतिको लागि अहिले साँझ ५ बजेसम्म मतदान समय तोकिएको छ । ५ बजेपछि क्याम्पस हाताको मुल गेट बन्द गरिने निर्वाचन समितिका सदस्य होमराज नेपालले बताउनुभयो । साँझ ५ बजेपछि भने मतदान स्थलमा भएकाहरुले मात्र मत खसाल्न पाउँनेछन् । ५ वटा मतदान स्थल बनाएर १३ जिल्लाका प्रतिनिधिहरुले मत अहिले खसालिरहेका छन् ।