बागमती प्रदेश सरकार सञ्चालन समन्वय कार्यदल संयोजक युवराज दुलाल बागमती प्रदेशका मुख्यमन्त्री राजेन्द्र पाण्डेलाई न्यूनतम साझा कार्यक्रमको प्रस्ताव बुझाउनुहुँदै । फाइल तस्वीर ।

हेटौंडाः बागमती प्रदेश सरकार सञ्चालन समन्वय कार्यदलले बागमती प्रदेशका मुख्यमन्त्री राजेन्द्र पाण्डेलाई बागमती प्रदेश सरकारको न्युनतम साझा कार्यक्रम–२०७८ को प्रस्ताव बुझाएको छ । कार्यदलका संयोजक युवराज दुलालले बिहीबार बागमती प्रदेशका मुख्यमन्त्री राजेन्द्र पाण्डेलाई न्यूनतम साझा कार्यक्रमको प्रस्ताव बुझाउनुभएको हो ।

प्रदेश सरकारको न्यूनतम साझा कार्यक्रमको प्रस्ताव बुझाउनुअघि प्रस्तावका बारेमा जानकारी गराउनुहुँदै बागमती प्रदेश सरकार सञ्चालन समन्वय कार्यदल संयोजक युवराज दुलाल ।

संघीय सरकारको सिको गर्दै बागमती प्रदेशको गठबन्धन सरकार सञ्चालनमा समन्वय गर्न नेकपा माओवादी केन्द्रका नेता, बागमती प्रदेश सभाका सदस्य एवम् पूर्वमन्त्री युवराज दुलालको संयोजकत्वमा ६ सदस्यीय कार्यदल गठन गरेको छ । कार्यदलले संयुक्त सरकारका ७ वटा प्राथमिकताको सूचिसहित ६ वटा शीर्षकमा नीति तथा कार्यक्रम प्रस्ताव गरेको छ । कार्यदलले पेश गरेको प्रस्तावमा कोभिड–१९ बाट प्रदेशका नागरिकको जीवन रक्षा गर्नु, कानूनी राज्य र सुशासनको प्रत्याभूति दिलाउनु, संघीयताको कार्यान्वयनका लागि प्रदेश सरकारको अधिकारको प्रयोग र स्थानीय तहका अधिकार हस्तान्तरण गर्नु, गुणस्तरीय शिक्षा र स्वास्थ्यमा नागरिकको पहूँच स्थापित गर्नु नीति तथा कार्यक्रमको प्राथमिकता हुनुपर्ने कार्यदलले प्रस्ताव गरेको छ ।

यस्तै कृषि र उत्पादनमुखी अर्थतन्त्रमा जोड, आपूर्ति व्यवस्थापनमा सुधार, महंगी नियन्त्रण तथा भ्रष्टाचारप्रति शून्य सहनशीलताको नीति अबलम्बन गर्नु, कोभिड–१९ बाट प्रभावित विपन्नलाई लक्षित कार्यक्रम सञ्चालन गर्नु र प्राकृतिक विपत्तिमा परेका जनतालाई राहत दिने गरी नीति तथा कार्यक्रमको प्राथमिकतामा पर्नुपर्ने सुझाव रहेको छ । कार्यदलले पेश गरेको सुझाव ग्रहण गर्नुहुँदै मुख्यमन्त्री राजेन्द्र पाण्डेले कार्यदलको सुझावकै आधारमा केही दिनमै नीति तथा कार्यक्रम सार्वजनिक गरिने बताउनुभयो ।