हेटौंडा: बारा जिल्लाको जीतपुरसिमरा उपमहानगरपालिका वडा नम्बर २ मा जारी तेस्रो भेट्रान कप २०७८ मा हेटौंडाको फ्रेन्डसिप भेट्रानले दोस्रो जीत हासिल गर्दै तेस्रो चरणमा प्रवेश गरेको छ । कोशेली युथ क्लबको आयोजनामा जारी प्रतियोगिताको चौथो दिन सोमबार भएको पहिलो खेलमा फ्रेन्डसिपले हेटौंडाकै नागश्वती फुटबल क्लबलाई पराजित गरेको हो ।
फ्रेन्डसिपले नागश्वतीलाई ट्राइब्रेकरमा ३–१ गोलअन्तरले पराजित गर्दै क्वाटरफाइनल प्रवेश गरेको छ । निर्धारित खेल गोलरहित बराबरीमा सकिएपछी खेल ट्राइब्रेकरमा धकेलिएको थियो । यस्तै सोमबार नै भएको दोस्रो खेलमा बिरगंज सिटि भेट्रानले हेटौंडाको एफ.सि कालभैरवलाई पराजित गर्दै सेमिफाइनलमा प्रवेश गरेको छ । बिरगंजले कालभैरवलाई सडेनडेथमा ६-५ गोलअन्तरले पराजित गर्यो ।
निर्धारित खेल १/१ गोलको बराबरीमा सकिएपछी बिजेताको चयन ट्राइब्रेकरबाट गर्ने निर्णय भएको थियो । ट्राइब्रेकरमा पनि ३-३ गोलको बराबरी भएपछी खेल सडेनडेथमा गएको थियो । खेलमा पहिलो हाफमा बिरगंजका तर्फबाट सुलभ जंग राणाले गोल गरेका थिए । दोस्रो हाफमा एफसी कालभैरवका तर्फबाट दिपक कुमार राईले बराबरी गोल गरेका थिए ।
खेलमा बिजयी भएको हेटौंडाको फ्रेन्डसिप भेट्रानले मंगलबार सेमिफाइनल प्रवेशका लागि सिमरा भेट्रान सिमरासँग प्रतिस्पर्धा गर्दैछ ।
