हेटौंडाः हेटौंडा–११, नवलपुरस्थित नवयुवा बचत तथा ऋण सहकारी संस्था लिमिटेडले १३ औं स्थापना दिवसको अवसरमा आइतबार पहिलो ५ सेवाग्राहीलाई सम्मान गरेको छ । सहकारीका अध्यक्ष हिमप्रसाद पौडेलले आइतबार सेवा लिन आउने पहिलो ५ सेयर सदस्यलाई खादा ओढाएर सम्मान गर्नुका साथै मायाको चिनो समेत प्रदान गर्नुभएको छ ।
सहकारीको स्थापना दिवस भदौ १५ गते हो । स्थापना दिवसका दिन कार्यालय बन्द रहने र सोमबार पनि सार्वजनिक बिदा परेकोले आईतबार नै सेयर सदस्यलाई सम्मान कार्यक्रम राखिएको सहकारीका अध्यक्ष हिमप्रसाद पौडेलले जानकारी दिनुभएको छ । स्थापना दिवसको दिन सहकारीले मानवसेवा आश्रमलाई खाद्यान्न सामग्री हस्तान्तरण गर्ने पनि अध्यक्ष पौडेलले जानकारी दिनुभएको छ ।
एक हजार नौं सय छ जना सेयर सदस्य रहेको सहकारीको सेयरपुँजी तीन करोड ८० लाख रुपैयाँ रहेको छ । यस्तै सहकारीले २० करोड १९ लाख रुपैयाँ बचत संकलन गरेको छ भने २० करोड ६६ लाख रुपैयाँ ऋण लगानी गरेको व्यवस्थापक राजेश श्रेष्ठले जानकारी दिनुभएको छ ।
