हेटौंडाः जनगायक जेबी टुहुरेप्रति हेटौंडाका कलाकारहरुले श्रद्धाञ्जली अर्पण गरेका छन् । हेटौंडा–२ स्थित पीएम सेन्टरमा शुक्रबार साँझ श्रद्धाञ्जली अर्पण गरिएको हो ।
टुहुरेको निधनप्रति दुख व्यक्त गर्दै शोकसभाको आयोजना गरिएको पीएम सेन्टरका सञ्चालक प्रमेन्द्र महर्जनले जानकारी दिनुभएको छ । शोकसभामा टुहुरेप्रति श्रद्धाञ्जली अर्पण गर्नुहुँदै प्रमेन्द्र महर्जनले ‘जीवन संघर्ष…’ बोलको गीत गाउनुभएको थियो । श्रद्धाञ्जली सभामा जेबी टुहुरेको विषयमा पीएम सेन्टरका सल्लाहकार नन्दरत्न स्थापित, तरंग सांस्कृतिक परिषद् मकवानपुरका अध्यक्ष उज्ज्वल शर्मा भण्डारी, साहित्य संगम मकवानपुरका पूर्वअध्यक्ष सुवास खनाल, गायक तुलुक लामाको पनि उपस्थिति रहेको थियो ।
जनगायक टुहुरेको बिहीबार निधन भएको थियो । स्वतन्त्रता र जनअधिकारको वकालत गर्दै जेबी टुहुरेलगायतका समूहले पञ्चायतकालमा जनजागरणका लागि गीत संगीतलाई माध्यमको रुपमा प्रयोग गर्नुभएको थियो ।
