हेटौंडाः जेसिआई बस्तिपुरले हेटौंडा–१९ कुवापानीमा रहेको गणेश प्राविका विद्यार्थीलाई शैक्षिक सामग्री सहयोग गरेको छ । जेसिआई बस्तिपुर हाँडीखोलाको सप्ताहव्यापी कार्यक्रम अन्तर्गत छैठौं कार्यक्रमको रुपमा विद्यालयका ९२ जना विद्यार्थीलाई शैक्षिक सामग्री सहयोग गरेको हो ।
शुक्रबार विद्यालयमै पुगेर विद्यार्थीलाई कापी, कलम, पेन्सील लगायतका १० हजार रुपैयाँ बराबरको शैक्षिक सामग्री प्रदान गरिएको जेसीज सप्ताह मूल कार्यक्रम संयोजक तेजप्रसाद उप्रेती (रमेश) ले जानकारी दिनुभयो । यस्तै पाँचौं कार्यक्रमको रुपमा जेसिआई बस्तिपुरले बिहिबार आमाघर मनहरीमा खाद्यान्न तथा मनहरी कोभिड अस्पतालका बिरामीहरुलाई फलफूल तथा जुस सहयोग गरेको थियो ।
यस्तै सप्ताहव्यापी कार्यक्रमको अन्तिम तथा सातौं कार्यक्रम अन्तर्गत समापन कार्यक्रम पनि शुक्रबार नै भएको छ । जेसिआई बस्तिपुरका अध्यक्ष राजेश भेटवालको सभाध्यक्षतामा भएको समापन कार्यक्रममा संस्थापक अध्यक्ष गणेश प्रसाद भेटवालको प्रमुख आतिथ्यता रहेको थियो ।
