हेटौंडाः हेटौंडा–५, भैरवरोडस्थित हाम्रो गोर्खा बचत तथा ऋण सहकारी संस्था लिमिटेडको आयोजनामा हेटौंडाको बुद्धचोकमा भएको रक्तदान कार्यक्रममा ४५ जनाले रक्तदान गरेका छन् । सहकारीको १३ औं स्थापना दिवसको अवसरमा रक्तदान कार्यक्रमको आयोजना गरिएको हो ।
सहकारीका अध्यक्ष चक्रधर विडारीको अध्यक्षता तथा जिल्ला बचत तथा ऋण सहकारी संघ लिमिटेडकी अध्यक्ष कल्पना श्रेष्ठको प्रमुख आतिथ्यमा रक्तदान कार्यक्रम भएको हो । सहकारीको शिक्षा समितिका संयोजक राजदेव बनियाँको संयोजनमा रक्तदान कार्यक्रम भएको हो ।
रगतको अभाव भएका कारण पछिल्लो समय रक्तदानका कार्यक्रम आयोजना गर्ने क्रम बढेको छ । शुक्रबार नेपालमा कम्युनिष्ट पार्टीको ७२ औं स्थापना दिवसको अवसरमा रक्तदान कार्यक्रम भएको थियो भने शनिबार संयुक्त अटो यातायात महासंघ मकवानपुरको आयोजनामा हेटौंडाको बुद्धचोकमा रक्तदान कार्यक्रमको आयोजना गरिएको छ ।
