हेटौंडाः हेटौंडामा जारी भिडोल विजय युथ हेटौंडा गोल्डकपमा सेन्ट्रल कलेज भरतपुर फुटबल क्लब (बीएफसी) फाइनलमा प्रवेश गरेको छ । हेटौंडाको वन विज्ञान अध्ययन संस्थानको खेलमैदानमा मंगलबार भएको पहिलो सेमिफाइनल खेलमा चितवनकै हर्दी युवा समाज, राप्तीलाई १–० गोलअन्तरले पराजित गर्दै बीएफसी फाइनल पुगेको हो ।
सेन्ट्रल कलेज बीएफसीका विदेशी खेलाडी जोन ग्लोरीले खेलको पहिलो हाफको ७ औं मिनेटमा गोल गर्दै आफ्नो टिमलाई अग्रता दिलाएका थिए । प्रतिस्पर्धात्मक खेलमा ग्लोरीको गोल नै निर्णायक हुन पुग्यो । जारी हेटौंडा गोल्डकपमा सर्वाधिक गोलकर्ताको शीर्ष स्थानमा रहेका ग्लोरीले पाँच गोल गरिसकेका छन् ।
खेलको दाजुभाइ स्वीट्स म्यान अफ द म्याच सेन्ट्रल कलेज बीएफसीका जितेश गुरुङ घोषित भए । गुरुङले नगद ५ हजारसहित ट्रफी प्राप्त गरेका थिए । गुरुङलाई म्यान अफ द म्याचको ट्रफी तथा नगद पुरस्कार नेपाली कांग्रेस मकवानपुरका पूर्वसभापति माईकल रामचन्द्र अयार्लले हस्तान्तरण गर्नुभएको थियो ।
प्रतियोगिताअन्तर्गत् आज बुधबारको दोस्रो सेमिफाइनल खेल हुनेछ । आयोजक विजय युथ क्लब र बागमती युवा क्लब सर्लाहीबीच दोस्रो सेमिफाइनल खेल हुने आयोजकले जानकारी दिएको छ ।
माघ २३ गते प्रतियोगिताको फाइनल खेल हुनेछ । १० टिम सहभागी भएको प्रतियोगिताको विजेताले नगद ३ लाख रुपैयाँसहित शिल्ड, मेडल र प्रमाणपत्र प्राप्त गर्नेछन् भने उपविजेता टिमले १ लाख ५० हजार रुपैयाँसहित शिल्ड, मेडल र प्रमाणपत्र प्राप्त गर्नेछन् ।
