मनहरीः मनहरीका सचेत नागरिकहरुको छलफलले गाउँपालिका क्षेत्रका विभिन्न नदी र खोलाहरुमा निर्माण हुन लागेको ५ वटा पक्की पुलको गुणस्तरको निगरानी राख्न पुल सरोकार समिति गठन गरेको छ । ठेक्का प्रक्रियामा गएका ५ वटै पुलको निर्माण प्रक्रियामा पारदर्शिता अपनाउन तथा गुणस्तर कायम गराउन दबाव दिन दीपेन्द्र अधिकारीको संयोजकत्वमा पुल सरोकार समिति गठन गरिएको हो ।
समितिमा मनहरी गाउँपालिका वडा नम्बर १ देखि ५ नम्बरसम्मका नागरिकहरुलाई समेटिएको संयोजक अधिकारीले जानकारी दिनुभएको छ । समितिमा भीमसेन अधिकारी, बिमल स्याङ्तान, चन्द्रबहादुर राई, सरोज अर्याल, सुरेन्द्र घलान, होतप्रसाद अधिकारी, रवि उप्रेती, रामहरि बिष्ट, श्रीकृष्ण ढकाल, सुरेन्द्रकुमार तितुङ, नानीबाबु थापा गोदार, कृष्णप्रसाद पौडेल, बालमुकुन्द ढकाल र राजन पाण्डे रहनु भएको छ । समितिले निर्माण कम्पनीले गर्ने कामको निगरानी गरी गुणस्तरीय काम गराउन आवश्यक निगरानी गर्ने जनाइएको छ ।
मनहरी गाउँपालिकाले ट्वांग्रा खोला, मसिने खोला, हाँडीखोला, च्यापल खोला लगायतका स्थानहरुमा पक्की पुलको ठेक्का सदर गरिसकेको छ । अब छिट्टै नै पुल निर्माण कार्यले गति लिने मनहरी गाउँपालिकाले जनाएको छ । बढीमा २४ महिनाभित्र हस्तान्तरण हुने गरी ५ वटै पुलको निर्माण कम्पनिसँग सम्झौता प्रक्रिया अघि बढेको गाउँपालिका प्रमुख प्रशासकीय अधिकृत देवराज चौलागाईले जानकारी दिनुभएको छ । मनहरी गाउँपालिकाले आफ्नै स्रोतबाट ५३ करोड लागत अनुमानसहित टेण्डर आव्हान गरेको ५ वटा पुलको निर्माणका लागि निर्माण कम्पनिहरुले ३३ करोडमा ठेक्का कबोल गरेका छन् ।
मनहरी गाउँपालिकाका अध्यक्ष एकराज उप्रेतीले नागरिक समाजको तर्फबाट निगरानी समूह गठन हुनु सकारात्मक भएको बताउनुभएको छ । उहाँले पुल निर्माणको कार्यको अनुगमन गर्न निजीक्षेत्रबाटै परमार्श कम्पनिसँग सम्झौता गर्ने अवधारणामा पनि पालिका रहेको बताउनुभएको छ । चालु आर्थिक वर्षमा ठेक्का सम्झौता गरेर काम अघि बढाउन पालिकाले ११ करोड रुपैयाँ बजेट विनियोजन गरेको जानकारी दिनुहुँदै अध्यक्ष उप्रेतीले भन्नुभयो, ‘पुल निर्माणका लागि प्रदेश र संघीय सरकारको सहयोग लिने प्रयास पनि गर्छौं ।’
