हेटौंडाः एकजना कर्मचारीमा कोरोना भाइरस सङ्क्रमण पुष्टि भएसँगै जिल्ला प्रशासन कार्यालय मकवानपुरले अत्यावश्यक सेवाबाहेकका सेवा बन्द गरेको जनाएको छ । बिहीबारदेखि लागु हुने गरी कात्तिक १ गतेसम्मका लागि सेवा बन्द गरिएको निमित्त प्रमुख जिल्ला अधिकारी चिरञ्जीवी शर्माले जानकारी दिनुभएको छ । जिल्ला प्रशासन कार्यालय मात्रै नभई उल्लेख्य सङ्ख्यामा कार्यालयहरु बन्द भएका छन् ।प्रशासन कार्यालयले शान्ति सुरक्षा, मुद्दा, विपद् व्यवस्थापन लगायतका अत्यावश्यक सेवाबाहेक अन्य सेवा बन्द रहने जनाएको छ ।
यस्तै बुधबारबाट हेटौंडाको सामुदायिक आँखा अस्पतालको सेवाहरु बन्द भएको छ । आँखा अस्पतालका कर्मचारीहरुमा पनि कोरोना सङ्क्रमण फैलिएसँगै आकस्मिक सेवा बाहेका अन्य सेवाहरु बन्द भएको अस्पतालका प्रशासकीय अधिकृत सुधीर श्रेष्ठले बताउनुभयो । शुक्रबारसम्म अस्पतालको आकस्मिक बाहेकका अन्य सेवाहरु बन्द हुने उहाँले बताउनुभयो । कर्मचारीमा कोरोना सङ्क्रमणकै कारण मालपोत कार्यालय ४ दिन बन्द रह्यो । कर्मचारीमा कोरोना भइरस सङ्क्रमणकै कारण मकवानपुरको मनहरी गाउँपालिका पनि बन्द छ ।
कर्मचारीमा कोरोना सङ्क्रमण पुष्टि भएकै कारण घरेलु तथा साना उद्योग कार्यालय मकवानपुरको सबै सेवा बिहीबारदेखि ५ दिनका लागि बन्द भएको छ । बिहीबारदेखि कार्तिक ३ गतेसम्म सेवाग्राहीलाई प्रदान गरिने उद्योग-वाणिज्य फर्म दर्ता, नवीकरण, नामसारी, ठाउँसारी लगायतका सम्पूर्ण सेवाहरु ५ दिनका लागि बन्द गरिएको कार्यालयका प्रमुख जगन्नाथ दाहालले बताउनुभयो । कार्यालयको एक जना कर्मचारीमा कोरोना पुष्टि भएपछि बिहीबारबाट सबै सेवाहरु बन्द गरिएको उहाँले जानकारी दिनुभयो ।
उहाँका अनुसार कार्यालयको आन्तरिक कार्य भने भौतिक दूरी कायम गरेर सञ्चालन भइरहेको छ । यस्तै घरेलु उद्योग कार्यालय मकवानपुरको समन्वयमा हेटौंडा बजार लगायत अन्य क्षेत्रको बजार अनुगमन पनि प्रभावित हुने भएको छ । घरेलु उद्योग तथा साना कार्यालय मकवानपुरका प्रमुख जगन्नाथ दाहालका अनुसार अब केही दिन अनुगमन प्रभावित हुने भएको हो । यसअघि घरेलुको समन्वयमा हेटौंडा बजार, पदमपोखरी लागयत अन्य स्थानहरुमा संयुक्त बजार अनुगमन हुँदै आएको थियो ।
कर्मचारीमा बढ्दो सङ्क्रमणकै कारण बागमती प्रदेशको राजधानी रहेको पालिका हेटौंडा उपमहानगरपालिका पनि बन्द हुने स्थितिमा पुगेको छ । कर्मचारीमा कोरोना सङ्क्रमण बढ्दै गएको भन्दै उपमहानगरपालिका पनि छिट्टै बन्द हुने एक कर्मचारीले जानकारी दिए ।
