हेटौँडा ः मकवानपुरका प्रहरीले लागूऔषध गाँजासहित पर्सा जिल्लाका सुरेश दास थारु र अर्जुन महतो थारुलाई हेटौँडाबाट पक्राउ गरेको छ । आइतबार हेटौँडा–१९, नेवारपानीस्थित ईलाका प्रहरी कार्यालयबाट खटिएको प्रहरी टोलीले पर्सा जिल्लाको सखुवा प्रसौनी गाउँपालिका–१ का ४२ वर्षीय सुरेश र गढी नगरपालिका–२ का २९ वर्षीय अर्जुनको साथबाट ११ किलो लागूऔषध गाँजा बरामद गरेको हो ।
पूर्व–पश्चिम राजमार्गमा सवारी साधनलाई रोकेर सुरक्षाजाँच गर्ने क्रममा नारायणगढबाट हेटौँडा हुँदै गौरतर्फ जाँदै गरेको लु १ ख ७३९५ नम्बरको यात्रुबाहक बसमा सवार सुरेश र अर्जुनको साथबाट गाँजा फेला परेको प्रहरीले जनाएको छ । लागूऔषधसहित दुबै जनालाई नियन्त्रणमा लिई मकवानपुर जिल्ला अदालतबाट ७ दिनको म्याद अनुमति लिई प्रहरीले हिरासतमै राखेर अनुसन्धान गरिरहेको जनाएको छ ।
