हेटौँडाः मकवानपुरको पूर्वी क्षेत्र बागमती गाउँपालिका–७ हवाङखोलामा ट्याक्टर र मोटरसाइकल आपसमा ठोक्किएर दुर्घटना भएको छ । शनिबार साँझ ७ बजेर ५० मिनेटको समयमा मदन भण्डारी लोकमार्गमा फापरबारीबाट झुरझुरेतर्फ जाँदै गरेको बागमती प्रदेश ०३–००१ त ४१५ नम्बरको ट्याक्टर र झुरझुरेबाट फापरवारीतर्फ जाँदै गरेको बा प्र ०३–००४ प ६३१८ नम्बरको मोटरसाइकल आपसमा ठोक्किएर दुर्घटना भएको बागमती प्रदेश प्रहरी कार्यालय हेटौँडाले जनाएको छ ।
दुर्घटनामा परी मोटरसाइकल चालक बागमती गाउँपालिका–८ का ४० वर्षीय दीपक बिश्वकर्मा घाइते भएका छन् । टाउकोमा चोट लागेका दीपकलाई उपचारका लागि हेटौँडास्थित मकवानपुर सहकारी अस्पताल पुर्याइएको थियो । शनिबार राती नै दीपकलाई थप उपचारका लागि भरतपुरस्थित पुरानो मेडिकल कलेज लगिएको र त्यहाँबाट पनि काठमाडौंस्थित न्यूरो अस्पताल लगिएको प्रहरीले जानकारी दिएको छ । प्रहरीले ट्याक्टर र ट्याक्टर चालक बागमती गाउँपालिका–८ का ५१ वर्षीय सुनिल राईलाई नियन्त्रणमा लिएको छ ।
