हेटौंडाः बारा जिल्लाको प्रहरीले २ जना फरार प्रतिवादीलाई पक्राउ गरेको छ । प्रहरी कारवाहीको सिलसिलामा फरार प्रतिवादीहरु धर्मेन्द्र साह र जैसीलाल यादवलाई पक्राउ गरिएको हो ।
जिल्ला प्रहरी कार्यालय बाराले कलैया उपमहानगरपालिका–११ बस्ने अन्दाजी २२ वर्षीय साहलाई सोमबार पक्राउ गरेको छ । जिल्ला अदालत बाराबाट आगलागी मुद्दामा ११ महिना ४ दिन कैद तथा १० हजार रुपैयाँ जरिवानाको सजाय तोकिएको साहलाई लुकिछिपी बसेको अवस्थाबाट पक्राउ गरेको हो ।
यस्तै, सूवर्ण गाउँपालिका–४, हर्दिया बस्ने अन्दाजी २० वर्षीय यादवलाई मंगलबार अस्थायी प्रहरी पोष्ट चारमोहनाले पक्राउ गरेको छ । जिल्ला अदालत बाराबाट चोरी मुद्दामा १ महिना ११ दिन कैद सजाय सुनाइएको यादवलाई प्रहरीले नियन्त्रणमा लिएर आवश्यक कारबाही अगाडि बढाएको छ ।
