हेटौंडाः हेटौंडा–२ स्थित हातेमालो बचत तथा ऋण सहकारी संस्था लिमिटेडले आफ्नो १८ औं स्थापना दिवस विभिन्न कार्यक्रम आयोजना गरी मनाइरहेको छ । मंगलबार संस्थाका अध्यक्ष हरी प्रसाद पौडेलको सभाध्यक्ष तथा बागमती प्रदेश सहकारी विकास बोर्डका कार्यकारी उपाध्यक्ष नारायण प्रसाद देवकोटाको प्रमुख आतिथ्यमा वार्षिकोत्सव औपचारिक रुपमा उद्घाटन भएको छ ।
कार्यक्रममा बोल्नुहुँदै कार्यकारी उपाध्यक्ष देवकोटाले सहकारीले सदस्य केन्द्रित ऋण लगानी गर्नुपर्ने बताउनुभएको छ । उत्पादन नहुने काममा लगानी गरे सहकारीमा समस्या आउने उहाँको भनाई छ । सहकारीले सदस्यहरुको आयआर्जन अगाडि बढ्नुपर्ने र समाजसेवाको काममा लाग्नुपर्ने उहाँले बताउनुभयो । राम्रा कामको प्रचारप्रसार गरी सहकारीलाई सुरक्षित र सदस्यमैत्री बनाउनुपर्ने उहाँले बताउनुभयो । संस्थाका अध्यक्ष हरी पौडेलले हातेमालोले सहकारीको नीति नियम अनुसार काम गरिरहेको बताउनुभयो । संस्थाले बिना धितो ऋण लगानी नगरेको बताउनुहुँदै उहाँले सहकारीलाई गुणस्तरीय बनाउन लागी परेको बताउनुभयो । उहाँले शेयर सदस्यहरुको आर्थिक र जीवनस्तर उकास्न आवश्यकताको आधार तालिम संचालन गरिने पनि बताउनुभयो ।
संस्थाले जेठ २ गतेदेखि ७ गतेसम्ममा संस्थाका ३४ जना महिलाहरुलाई सेल्फ मेकअप तालिम आयोजना गरेको छ । महिलाहरुलाई बाहिर पार्लरमा मेकअप गर्दा लाग्ने खर्च बचत गर्ने उद्देश्यले तालिम आयोजना गरिएको जनाएको छ । तालिममा सहभागीहरुलाई संगीता श्रेष्ठले प्रशिक्षण दिनुभएको थियो । मंगलबार तालिममा सहभागीलाई प्रमाणपत्र वितरण गरिएको छ । यस्तै संस्थाले आइतबार जीवन निर्माण अभियान कार्यक्रम सञ्चालन गरेको थियो ।
संस्थाले वार्षिकोत्सवको अवसरमा जेठ ११ गते भान्छा सुधार अभियान तथा स्वस्थ रहने वैज्ञानिक सिद्धान्तबारे, १२ गते सञ्चालक समिति, उपसमिति, कर्मचारी, संस्थापक तथा पूर्व सञ्चालकहरुबीच समिक्षा बैठक गर्ने भएको छ । यस्तै १३ गते असल बचतकर्ता र ऋणी सदस्यहरुसँग अन्तरक्रिया तथा सम्मान कार्यक्रम, १४ गते रक्तदान तथा स्वास्थ्य परीक्षण र हेटौंडा–१० स्थित संस्कृत वेद विद्यालयलाई सहयोग गरी मनाउने भएको छ ।
२ हजार ७ सय सेयर सदस्य रहेको सहकारीमा चालु आर्थिक वर्षको बैशाख मसान्तसम्ममा ६ करोड ३६ लाख १६ हजार रुपैयाँ शेयर पुँजी छ भने ५२ करोड ३४ लाख २७ हजार रुपैयाँ ऋण लगानी गरेको छ । कार्यक्रममा हेटौँडा–२ का वडाध्यक्ष विष्णुगोपाल महर्जन र हेटौँडा उपमहानगरपालिकाका सहकारी शाखा प्रमुख हिमप्रसाद पौडेल लगायतको पनि आतिथ्य रहेको थियो ।
