हेटौँडाः लागुऔषध चरेससहित थाहाका दुई जना पक्राउ परेका छन् । पक्राउ पर्नेमा थाहा नगरपालिका–८ स्थित आग्राका २२ वर्षीय नारायण दमाई र सोही ठाउँका ३८ वर्षीय राजेन्द्र दमाई रहेका छन् ।
आइतबार बिहान १० बजेको समयमा धादिङ जिल्लाको थाक्रे गाउँपालिका–२ महादेववेशीस्थित आग्रा मनहरी सडकखण्डमा प्रहरी चौकी महादेववेशी धादिङबाट खटिएको प्रहरी टोलीले सवारी साधन सुरक्षाजाँच गर्ने क्रममा मकवानपुरबाट महादेववेशीतर्फ जाँदै गरेको ना ४ ख ४८३ नम्बरको यात्रु बाहक बसमा सवार दुई जनालाई प्रहरीले लागुऔषधसहित पक्राउ गरेको हो ।
कपडाभित्र लुकाएको अवस्थामा उनीहरुको साथबाट प्रहरीले १९ वटा पाकेटमा ९ केजी ५ सय ग्राम चरेस फेला पारी बरामद गरेको थियो । पक्राउ परेका दुवै जनालाई मंगलबार जिल्ला अदालत धादिङमा उपस्थित गराएर ६ दिनको म्याद थपी अनुसन्धान गरिरहेको जनाएको छ ।
