हेटौँडाः हेटौँडाका लघु कथाकार श्यामप्रसाद श्रेष्ठको लघु कथासंग्रह पोखरामा सार्वजनिक गरिएको छ । पोखरामा आयोजित पाँचौं संस्करणको नेपाल–भारत साहित्य महोत्सवमा श्रेष्ठको कथासंग्रह “व्यथाभित्रको कथा” सार्वजनिक गरिएको हो । तीन दिवसीय महोत्सवअन्तर्गत पहिलो दिन बिहिबार कृति लोकार्पणसँगै लघुकथा एवम् काव्य वाचन भएको छ ।
क्रान्तिधरा साहित्य अकादमीद्वारा आयोजित महोत्सवको उद्घाटन सत्रमा हेटौँडाका लघुकथाकार किशन पौडेलको हिन्दी अनूदित लघुकथा कृति “अन्तरदृष्टि” लघुकथा संग्रहको औपचारिक लोकार्पण र समीक्षा समेत गरिएको थियो । गण्डकी प्रज्ञा प्रतिष्ठानका अध्यक्ष पदमराज ढकालको प्रमुख आतिथ्यमा भएको कार्यक्रममा विशिष्ट अतिथिको रूपमा वीरगन्जका वरिष्ठ साहित्यकार गणेश प्रसाद लाठ, भारतीय दूतावासका अधिकारी सत्येन्द्र दहिया, नेपाल नाट्य तथा सङ्गीत प्रतिष्ठानका पूर्व उपकुलपति सरुभक्त श्रेष्ठ, बर्दघाट प्रज्ञा प्रतिष्ठानको उपकुलपति डा. घनश्याम परिश्रमी, भारत पटनाको वरिष्ठ लघुकथाकार विभा रानीको पनि आतिथ्य रहेको थियो ।
लघुकथा सत्रको प्रमुख अतिथि भाषा आयोगका सदस्य डा. पुष्करराज भट्ट हुनुहुन्थ्यो । विमोचित कृतिमाथि डा. भट्ट र भारतका वरिष्ठ साहित्यकार विभा रानी श्रीवास्तवले चर्चा गर्नुभएको थियो । क्रान्तिधरा साहित्य अकादमीका संस्थापक अध्यक्ष विजय पण्डितको संयोजकमा आयोजित कार्यक्रममा वरिष्ठ काव्यकार डा. बलराम उपाध्याय रेग्मीको सभाध्यक्षतामा सञ्चालन गरिएको थियो ।
